Pamior Čžu Žunczi — čałaviek, jaki pieratvaryŭ Kitaj u najmahutniejšuju handlovuju dziaržavu

Były premjer Dziaržaŭnaha savieta KNR Čžu Žunczi, jaki ŭznačaliŭ intehracyju Kitaja ŭ suśvietny handal i zakłaŭ asnovu dla imklivaha ekanamičnaha rostu krainy, pamior va ŭzroście 97 hadoŭ, piša Bi-bi-si.

Čžu Žunczi z 1998 da 2003 hoda zajmaŭ druhuju pa značnaści dziaržaŭnuju pasadu ŭ krainie. Jon adyhraŭ viadučuju rolu va ŭstupleńni Kitaja ŭ Suśvietnuju handlovuju arhanizacyju, adkryćci kitajskich pradpryjemstvaŭ dla mižnarodnaha rynku i załučeńni zamiežnych inviestycyj.

Čžu Žunczi ŭvajšoŭ u historyju jak adzin z klučavych ekanamičnych refarmataraŭ. Mienavita jon pieradaŭ padatkovyja paŭnamoctvy ad miascovych uładaŭ centralnamu ŭradu, likvidavaŭ abo pryvatyzavaŭ nierentabielnyja dziaržaŭnyja pradpryjemstvy, a taksama daŭ šturšok raźvićciu rynku pryvatnaha žylla.

Šmat kamu jon zapomniŭsia jak žorstki i prahmatyčny lidar, jaki damohsia dvuchznačnych tempaŭ ekanamičnaha rostu i nie bajaŭsia vykazvać svajo mierkavańnie.

U 1998 hodzie jon zajaviŭ, što Kitaj čakaje mnostva patencyjnych kryzisaŭ, jakija mohuć uspychnuć u luby momant.

«Prostyja ludzi niezadavolenyja nami pa mnohich pryčynach. Asabliva z-za karupcyi siarod kiraŭnikoŭ, razryvu pamiž bahatymi i biednymi i z-za taho, što niekatoryja miascovyja kiraŭniki pavodziać siabie jak tyrany», — skazaŭ jon.

Čžu Žunczi nazyvaŭ niesumlennych bankiraŭ «idyjotami» i kazaŭ, što damby i supraćpavodkavyja zbudavańni ŭzdoŭž Janczy «nienadziejnyja i dziravyja, niby tofu».

Pad jaho kiraŭnictvam udałosia stabilizavać ekanomiku i źnizić uzrovień karupcyi. Kitaj pačaŭ pieratvaracca ŭ industryjalnuju dziaržavu, pazbaŭlajučysia statusu kamunistyčnaha aŭtsajdara.

U toj ža čas hetyja reformy pryviali da zvalnieńnia 30 miljonaŭ čałaviek za piać hadoŭ, a vielizarny ekanamičny rost sparadziŭ jašče bolšuju niaroŭnaść.

Čžu Žunczi naradziŭsia ŭ centralnaj pravincyi Chunań u 1928 hodzie i da pastupleńnia na dziaržaŭnuju słužbu atrymaŭ dypłom inžyniera-elektryka.

U 1949 hodzie jon ustupiŭ u Kamunistyčnuju partyju.

Jon dvojčy padviarhaŭsia «partyjnym čystkam»: upieršyniu — za toje, što nazvaŭ ekanamičnuju palityku Mao Czeduna iracyjanalnaj, za što jaho abviaścili «pravym uchilistam», a druhi raz — padčas Kulturnaj revalucyi.

Paśla śmierci Maa Čžu byŭ adnoŭleny ŭ partyi i da 1991 hoda zaniaŭ pasadu vice-premjera, adkaznaha za ekanomiku Kitaja.

Praź siem hadoŭ jon staŭ premjeram.

Čžu vioŭ składanyja pieramovy ab ustupleńni Kitaja ŭ Suśvietnuju handlovuju arhanizacyju ŭ 2002 hodzie.

Niekrałohi ŭ kitajskich dziaržaŭnych ŚMI apisvajuć jaho jak «zahartavanaha časam viernaha zmahara za ideały kamunizmu, vydatnaha praletarskaha revalucyjaniera i palityčnaha dziejača».

• 0
• 0
• 0
• 1
• 2
• 2
• 0
• 0