Biełaruska tak źlatała na Kubu, što adsudziła poŭny košt pucioŭki

Žančyna nabyła pucioŭku dla siabie i syna. Pavodle płanu, letaś jany pavinny byli lacieć z Maskvy ŭ Alhin 29 kastryčnika i viarnucca 9 listapada. Žyć jany pavinny byli ŭ čatyrochzorkavym hateli.

Ale jašče da pajezdki ŭźnikli prablemy. Na Kubu nasoŭvaŭsia ŭrahan «Mielisa», a aeraport Alhina zakryli z 27 da 30 kastryčnika. Žančyna niekalki razoŭ pisała turahientu i prasiła pieranieści pajezdku abo padabrać inšy varyjant. Ale joj adkazali, što padstaŭ dla hetaha niama.

29 kastryčnika jana pryjechała ŭ aeraport Šaramiećjeva, ale vylet zatrymali bolš čym na sutki, praz heta adpačynak staŭ karaciejšym.

Pry hetym maršrut taksama źmianili: zamiest Alhina samalot pavinien byŭ lacieć u inšy aeraport, a turystka daviedałasia pra heta ŭžo na terytoryi Kuby.

Paśla prylotu vyśvietliłasia, što i hatel budzie inšym. Zamiest abiacanaha čatyrochzorkavaha hatela žančynu z synam pasialili ŭ inšym miescy, jakoha ŭ damovie nie było.

U materyjałach spravy jaho apisvajuć tak: «Poŭnaja adsutnaść ježy ŭ časavy pramiežak pamiž pryjomami ježy, najaŭnaść nasiakomych u ježy, numar mieŭ zakinuty vyhlad, pałamanyja razietki, złamanuju santechniku».

Žančyna fatahrafavała niedachopy i adpraŭlała skarhi. Jany dajšli da turapieratara — u materyjałach spravy zachavałasia pierapiska, jakaja paćviardžaje zvaroty turystki.

Pry hetym da pačatku pajezdki joj nie paviedamili, što źmieniacca maršrut, terminy i miesca pražyvańnia. Pra značnuju častku hetych źmien jana daviedałasia ŭžo niepasredna padčas padarožža.

Paśla viartańnia turystka nakiravała kampanii pretenziju. Jana zapatrabavała skasavać damovu, viarnuć 7587,71 rubla, jakija zapłaciła za tur, a taksama kampiensavać maralnuju škodu.

Kampanija pahadziłasia tolki z častkaj patrabavańniaŭ i pryznała, što tur byŭ karaciejšym. Tady žančyna źviarnułasia ŭ sud.

Sud vyrašyŭ, što turystyčnaja pasłuha sapraŭdy była akazanaja nie tak, jak damaŭlalisia. Źmianili maršrut, hatel i praciahłaść pajezdki, a ŭmovy pražyvańnia byli horšymi za abiacanyja. Hetyja parušeńni sud pryznaŭ istotnymi.

Damovu ŭ vyniku skasavali. Turystyčnaj kampanii daviadziecca viarnuć žančynie 7587,71 rubla. Jašče pa 500 rubloŭ sud prysudziŭ joj i jaje synu za maralnuju škodu.

Sudovaja kalehija pa hramadzianskich spravach Homielskaha abłasnoha suda pakinuła hetaje rašeńnie bieź źmien. Jano ŭžo ŭstupiła ŭ zakonnuju siłu.

• 1
• 0
• 0
• 0
• 0
• 0
• 0
• 0