U Pieciarburhu pradavačka ź Biełarusi pavieryła machlaram i vyniesła hrošy z kasy. Ale kampiensavać haspadaru admoviłasia
Połackaja hieadezistka Lilija Dziatko padpisała hrafik, pa jakim budzie addavać hrošy. Ale paśla pieradumała płacić. I sud častkova staŭ na jaje bok.
44‑hadovaja Lilija Dziatko ŭ svoj čas vyvučyłasia ŭ Połacku na inžyniera-hieadezista, ale ŭrešcie pajechała pracavać u Rasiju. U 2021 hodzie jana ŭładkavałasia ŭ Sankt-Pieciarburhu kasirkaj-pradavačkaj u buciku italjanskaha abutku i adzieńnia Noone.
Adnaho dnia, kali jana była na pracy, u kramu na stacyjanarny telefon patelefanavaŭ nieznajomy čałaviek. Jon nahavaryŭ štości takoje, što Lilija ŭziała z kasy ŭsio, što było — kala $4500, pakłała hrošy ŭ bankamacie na ŭłasnuju kartku i pieraviała ich surazmoŭcu.
Što heta byŭ za machlar, tak i nie zrazumieła. Ale hrošy viarnuć tak i nie ŭdałosia.
Haspadary kramy, naturalna, nie paradavalisia dziŭnaj historyi, ale ŭvajšli ŭ stanovišča — pahadzilisia, kab biełaruska viartała hrošy častkami. Jana padpisała pahadnieńnie — što abaviazujecca spačatku addać kala $1150, paśla jašče stolki ž, a reštu chaj u jaje ŭtrymlivajuć z zarobku, prykładna pa $250 na miesiac.
Adnak u vyniku Dziatko ničoha tak nie viarnuła, a ŭrešcie ŭvohule zvolniłasia pa ŭłasnym žadańni. Tady haspadary kramy pajšli ŭ sud.
Sud pryznaŭ, što pavodle słužbovaj instrukcyi biełaruska adkazvała za zachavanaść kasavaj vyručki. A pierš čym vykonvać ukazańni nieviadomaj asoby pa telefonie, Lilija pavinna była jaje identyfikavać, adnak hetaha nie zrabiła.
Tym nie mienš było vyrašana ŭličyć, što biełaruska niebahataja, u jaje jość prablemy ŭ siamji. Tamu ź Lilii Dziatko spahnali tolki $2840, kala 63% ad taho, što jana vyniesła z kasy.
Kamientary