Naŭrocki za hod pry ŭładzie vydaŭ biełarusam u 83 razy mienš polskich pašpartoŭ, čym Duda

Dva sposaby atrymać hramadzianstva

U Polščy isnujuć dźvie pracedury atrymańnia hramadzianstva zamiežnikami: praz vajavodu (uznanie za polskiego obywatela / pryznańnie polskim hramadzianinam) i praz prezidenta (nadanie obywatelstwa / pradastaŭleńnie hramadzianstva).

Pieršy varyjant standartny i najbolš raspaŭsiudžany. Dla atrymańnia polskaha pašparta praz vajavodu zamiežnik u zaležnaści ad padstaŭ musić pražyć u Polščy ad adnaho da dziesiaci hadoŭ, zdać moŭny ekzamien na ŭzrovień V1 i adpaviadać šerahu inšych patrabavańniaŭ.

U vypadku pradastaŭleńnia hramadzianstva prezidentam vykonvać nijakich umoŭ u tym liku pa časie pražyvańnia nie treba, jak i zdavać moŭny ekzamien.

Takoj mahčymaśćciu karystalisia tysiačy ludziej štohod. Siarod ich byli i pa niekalki sotniaŭ hramadzian Biełarusi. Amal usie jany mieli polskaje pachodžańnie i kartu palaka.

Bolš za ŭsio polskich pašpartoŭ ad prezidenta hramadzianie Biełarusi atrymali ŭ 2021 hodzie — 503 čałavieki. Ale pracedura była papularnaja i raniej, kali jašče pierajezd u Polšču nie byŭ nastolki masavym.

Tak, naprykład, u 2019‑m 334 hramadzianiny Biełarusi atrymali hramadzianstva praz prezidenta.

Etničnym palakam z kartaj palaka ŭ 2010‑ia zajmieć polskaje hramadzianstva takim čynam časam atrymlivałasia, navat kali jany zusim nie žyli ŭ Polščy. Ale z časam atrymać pašpart pa takoj schiemie stanaviłasia składaniej.

Pavialičyć

U 2022‑m 410 biełarusaŭ atrymali hramadzianstva Polščy ad prezidenta, u 2023‑m — 265, u 2024‑m — 166. Ciaham usiaho 2025 hoda tolki 102 hramadzianiny Biełarusi atrymali hramadzianstva ad Dudy.

U žniŭni 2025 hoda na pasadu prezidenta Polščy zastupiŭ Karal Naŭrocki. Pavodle danych Gazeta.pl, u pieryjad z 6 žniŭnia 2025 pa 13 žniŭnia 2026‑ha jon daŭ polskaje hramadzianstva tolki dvum biełarusam.

Aproč dvuch biełarusaŭ, Naŭrocki daŭ hramadzianstva jašče 60 čałaviekam, ź jakich było 36 hramadzian Ukrainy. Na druhim miescy pa papularnaści iduć izrailcianie — 8 čałaviek. Na trecim — hramadzianie Vjetnama — 6 čałaviek.

Kali paraŭnać hramadzian Ukrainy i Biełarusi, jakija zvyčajna zajmali pieršaje i druhoje miescy, to skaračeńnie ŭ biełarusaŭ našmat bolšaje.

Kali paraŭnoŭvać pieršy hod pracy Naŭrockaha z 2024 hodam (apošni hod, kali Duda byŭ prezidentam ciaham usiaho hoda), to vynikaje, što kolkaść biełarusaŭ, jakim prezident Polščy daŭ hramadzianstva, skaraciłasia ŭ 83 razy — z 166 da 2 čałaviek.

Pavialičyć

Z ukraincami skaračeńnie taksama vielizarnaje, ale nie takoje, jak u vypadku ź biełarusami. Kali ŭ 2024‑m 759 hramadzian Ukrainy atrymali pašparty ad prezidenta Dudy, to za hod kiravańnia Naŭrockaha — usiaho 36 čałaviek. Heta ŭ 21 raz mienš.

Što heta aznačaje? 

Vidavočna, što padychod Naŭrockaha da vydačy hramadzianstva zamiežnikam kardynalna adroźnivajecca ad jahonych papiarednikaŭ. Duda za dziesiać hadoŭ pry ŭładzie daŭ hramadzianstva 20 500 čałaviekam, to-bok u siarednim krychu bolš čym pa 2000 čałaviek štohod. Kamaroŭski za piać hadoŭ nadaŭ hramadzianstva 12 700 čałaviekam, ci kala 2540 štohod.

I kali pa vynikach pieršaha hoda kiravańnia Naŭrockaha vynikaje, što atrymańnie hramadzianstva praz prezidenta amal niemahčymaje, to pa zvyčajnaj pracedury kolkaść atrymalnikaŭ polskaha pašparta praciahvaje raści.

Tak, za 2025 hod bolš za 19 tysiač zamiežnikaŭ stali hramadzianami Polščy — siarod ich kala 10 tysiač ukraincaŭ i kala 6500 biełarusaŭ.

Ahułam tolki za apošnija čatyry hady polski pašpart atrymali kala 20 tysiač hramadzian Biełarusi. 

• 1
• 1
• 2
• 3
• 0
• 0
• 2
• 0