Z rasijanina sprabujuć spahnać bolš za 162 tysiačy rubloŭ za niezakonna zdabytaha ŭ Biełarusi zubra
Sud Pietrykaŭskaha rajona zadavoliŭ pazoŭ prakurora i pastanaviŭ spahnać z hramadzianina Rasii bolš za 162 tysiačy rubloŭ štrafu za niezakonnuju zdabyču zubra. Akramia taho, mužčyna pavinien vypłacić bolš za 8,1 tysiačy rubloŭ dziaržaŭnaj pošliny, paviedamiła Hienprakuratura.
Incydent adbyŭsia bolš za 10 hadoŭ tamu, jašče ŭ śniežni 2015 hoda. Mužčyna ŭdzielničaŭ u palaŭničym tury ŭ Nacyjanalnym parku «Prypiacki». Padčas zahonnaha palavańnia jon niezakonna zdabyŭ zubra, jaki nie byŭ paznačany ŭ jahonaj palaŭničaj pucioŭcy.
U dačynieńni da palaŭničaha raspačali kryminalnuju spravu za niezakonnaje palavańnie, jakoje paciahnuła škodu ŭ asabliva bujnym pamiery. U studzieni 2016 hoda prakuror Pietrykaŭskaha rajona padaŭ pazoŭ ab spahnańni na karyść nacyjanalnaha parku płaty ŭ piacirazovym pamiery koštu dazvołu na zdabyču zubra. Na toj momant suma patrabavańniaŭ składała 80 tysiač jeŭra ŭ ekvivalencie pa kursie Nacbanka.
U 2017 hodzie kryminalnuju spravu pieradali ŭ Rasiju dla dalejšaha rasśledavańnia. U 2020 hodzie kryminalny pieraśled spynili praz zakančeńnie terminu daŭniny, adnak škoda tak i nie była kampiensavanaja.
Tamu ŭ 2021 hodzie prakuror źviarnuŭsia ŭ sud užo z hramadzianskim pazovam. Paśla praviedzienaj denaminacyi suma patrabavańniaŭ skłała bolš za 162 tysiačy rubloŭ.
Rasijaninu naležnym čynam paviedamili pra sudovaje pasiadžeńnie, ale jon na jaho nie źjaviŭsia. U piśmovaj zajavie mužčyna paviedamiŭ, što nie zhodny z patrabavańniami.
Sud pastanaviŭ zadavolić pazoŭ prakurora ŭ poŭnym abjomie. Ale rašeńnie pakul nie nabyło zakonnaj mocy.
Ciapier čytajuć
Na aŭtašou ŭ Lidzie ledź nie zahinuŭ adzin z samych znakamitych kaskadzioraŭ Biełarusi — jaho videa sabrali amal paŭmiljarda prahladaŭ. Što ź im ciapier?4
Kamientary