Łukašenka naviedaŭ Suśvietnuju vystavu «EKSPA-2010» u Šanchai

Alaksandr Łukašenka, jaki znachodzicca z rabočym vizitam u Kitai, 10 kastryčnika naviedaŭ Suśvietnuju vystavu «EKSPA-2010» u Šanchai, dzie pabyvaŭ u nacyjanalnych paviljonach Biełarusi i Kitaja.

Taksama kiraŭnik dziaržavy uziaŭ udzieł u cyrymonii simvaličnaha adkryćcia Biełaruska-kitajskaha technaparka ŭ horadzie Čančuń u paviljonie ekspazicyi pravincyi Cziliń.

Na 11 kastryčnika zapłanavana sustreča Łukašenki sa staršynioj KNR Chu Czińtao

i ŭdzieł u adkryćci zboračnaj vytvorčaści karjernych mašyn BiełAZa, tamu samalot kiraŭnika biełaruskaj dziaržavy vylecić siońnia ŭ z Šanchaja ŭ Piekin pozna viečaram.

«Našy adnosiny z Kitajskaj Narodnaj Respublikaj majuć charaktar stratehičnych. U nas vydatnyja adnosiny z Kitajem, — skazaŭ Łukašenka 1 kastryčnika na pres-kanfierencyi žurnalistam rasijskich ŚMI. — Dastatkova skazać, što napiaredadni byłych prezidenckich vybaraŭ, 5 hadoŭ tamu, tahačasny prezident Kitaja Czian Czemiń pryjechaŭ siudy i ŭ adkrytuju, na złość Zachadu, Amierycy, padtrymaŭ i mianie, i Biełaruś. Śpiecyjalna pryjechaŭ siudy. Ja dumaju, što nam treba canić takoje staŭleńnie vialikaha Kitaja da Biełarusi. (…) Niekatoryja vykazvajuć zakłapočanaść u Rasii adnosinami Biełarusi z Kitajem. (…)

Ja pavinien skazać, što na siońniašni dzień, kali ŭzvažvać inviestycyi Kitaja i Rasii, to ŭ Rasii, napeŭna, nie na paradak, a na niekalki paradkaŭ abjomy inviestycyj, ułasnaści tut bolš čym u Kitajskaj Narodnaj Respubliki. Ale Kitaj aktyŭna idzie na biełaruski rynak. I my hetamu rady».

Suśvietnaja vystava «EKSPA-2010» pravodzicca ŭ Šanchai z 1 maja pa 31 kastryčnika 2010 hoda. Udzieł u joj biaruć 192 dziaržavy i 54 mižnarodnyja arhanizacyi. Tematyka vystavy — «Lepšy horad — lepšaje žyćcio» — demanstruje namahańni kožnaj dziaržavy pa stvareńni najbolš kamfortnaha asiarodździa pražyvańnia nasielnictva haradoŭ.

Paviljon biełaruskaj ekspazicyi składaje 1 tys. kv. m, pałova ź jakich pradstaŭlena kitajskimi arhanizatarami na biazvypłatnaj asnovie. Jon raźmieščany ŭ centry «płoščy Jeŭropy» pobač z paviljonami Bośnii i Hiercahaviny, Čechii, Słavakii i Partuhalii.

«EKSPA-2010» zadumana arhanizatarami jak najbujniejšaja ŭ historyi suśvietnych vystaŭ pa zaniataj terytoryi, kolkaści naviedvalnikaŭ i kolkaści ŭdzielnikaŭ. Praviadzieńnie vystavy taksama pavinna paćvierdzić status Šanchaja jak najbujniejšaha dziełavoha centra Azii. Čakajecca, što za ŭvieś pieryjad pracy vystavu naviedajuć bolš za 70 młn. čałaviek.

• 0
• 0
• 0
• 0
• 0
• 0
• 0
• 0