Maci abvinavačanaha ŭ terakcie nie vieryć, što jon maje dačynieńnie da vybuchu u mietro

U maci abvinavačanaha ŭ terakcie 11 krasavika apisali majomaść i praviali jašče adzin pieratrus — u viaskovaj chacie, dzie žyli dziadula i babula źniavolenaha. Sam jon nia byŭ u toj vioscy bolš za 10 hod.

Maci adnaho z dvuch abvinavačanych u arhanizacyi vybuchu ŭ mienskim metro 11 krasavika raspaviała, što syn ciapier na psychijatryčnaj ekspertyzie. Jaho špitalizavali na 21 dzień, i medyki pavinny zrabić vysnovy nakont stanu jahonaha psychičnaha zdaroŭja. Maci najbolš chvalujecca za fizyčnaje zdaroŭje: chłopiec chranična chvareje na astmu alerhičnaha pachodžańnia. Mienavita tamu jon daŭno nia jeździŭ u viosku, dzie žyli jaho dziadula i babula. Ale 14 červienia tudy pryjechali śledčyja ź pieratrusam, raspaviadaje maci:

— Jeździli ź pieratrusam na maju radzimu. Tam žyli baćki, jakija pamierli 13 hadoŭ tamu. Tam chata staraja. Hladzieli ŭ chacie, pa šafach, u puńkach… Ja spytała, što jany kankretna šukajuć. Skazali, što niejki damkrat…».

Jakoje dačynieńnie maje hetaja pryłada da vybuchu ŭ metro, maci ŭdakładniać nia stała. Napiaredadni ŭ jaje apisali majomaść u viciebskaj kvatery — supracoŭniki milicyi patłumačyli, što da abvinavačanych mohuć być materyjalnyja pretenzii za naniesienuju škodu. Pieralik apisanaj majomaści maci nie pakinuli:

— Ja kažu: majomaści jahonaj niama. Što było — adzieńnie tam — dyk zabrali padčas druhoha pieratrusu i biez usialakaha pratakołu. Susiedzi našy, što byli paniatyja, taksama kazali, što niama padstavaŭ, što heta rečy baćkoŭ… Ale pahladzieli — u nas televizar, druhi televizar, kamputar… Ja navat nie pračytała, što jany tam apisali.

Ja skazała tolki adno: «Zabirajcie! Biarycie! Tolki addajcie mnie dzicia!».

Maci nia vieryć u datyčnaść syna da vybuchu ŭ mienskim metro. Aprača hetaha, abodvuch źniavolenych u SIZA KDB chłopcaŭ vinavaciać u arhanizacyi dvuch vybuchaŭ u Viciebsku ŭ 2005 hodzie, u arhanizacyi vybuchu 4 lipienia 2008 hodu ŭ Miensku, a taksama ŭ 14 złačynstvach, ździejśnienych z 2000 pa 2011 hod u viciebskim rajonie DSK, dzie žyli mierkavanyja «terarysty».

Nia vierać u heta i siabry aryštavanaha. Siarhiej i Andrej vyraśli z abvinavačanymi ŭ susiednich dvarach:

— 14 złačynstvaŭ — prosta tryźnieńnie niejkaje! Heta asabistaja maja dumka, niachaj u ich tam užo pa 10 tamoŭ na kožnaje panapisana….

— DSK — nie taki vialiki rajon, kab tut nia čuli ažno pra 14 złačynstvaŭ. My dumali-dumali, baćki našy dumali-dumali, ale nivodnaha złačynstva zhadać nie zmahli.

Paśla zatrymańnia siabra Siarhiej vyrašyŭ źviazacca z žurnalistami i napisaŭ elektronny list u «Kamsamolskuju praŭdu». Ale praz telefon jamu zahadali nie zaminać śledztvu:

— Na nastupny dzień — zvanok. Numar nia vyznačany. Skazaŭ, što jon z KDB i što nia treba havaryć nikomu lišnich słovaŭ… A ja pryciahnuć uvahu chacieŭ da hetaj spravy! Mnie, kali vyklikali ŭ KDB na dopyt, taksama telefanavaŭ niavyznačany numar. Voś u mianie pytalisia, jak ja mahu siabra acharaktaryzavać. Jak tolki ja pačynaŭ kazać niešta dobraje, śledčy adkładaŭ asadku i pierastavaŭ zapisvać!

Vital, jašče adzin siabar abvinavačanaha, nia bačyć matyvu złačynstva, tamu sumniajecca ŭ spraviadlivaści zatrymańnia:

— Kali ja nienavidžu milicyjantaŭ — budu ŭzryvać apornyja punkty. Kali nienavidžu palitykaŭ — nu choć petardu kala ichnaha doma kinu. A dla destabilizacyi ŭ hramadztvie, jakoje i tak destabilizavana, — heta łuchta! I ŭvohule ja nie ŭjaŭlaju, kab jon viedaŭ, jak treba źmiašać aceton ź niečym tam jašče ŭ niejkich tam praporcyjach… Heta ž adukacyju treba mieć! A ŭ jaho niama… I ŭ padručniku pa chimii za siomuju klasu było tolki napisana adnym radkom, što tracił — heta čaćviortaja vytvornaja ad fenołu. Usio!.

Dniami było abvieščana, što termin śledztva pa spravie vybuchu 11 krasavika praciahnuta na niapeŭny termin. Siabry miarkujuć, što čas spatrebiŭsia, kab ludzi krychu zabylisia pra vybuch u štodzionnych kłopatach, i što śledčym prosta nie staje dokazaŭ suprać abvinavačanych.

• 0
• 0
• 0
• 0
• 0
• 0