Dziŭny parad biez apładysmientaŭ. Cicharoŭ bolš, čym śviatkujučych. Pratestami i nie pachła

U Minsku siońnia adbyvajucca ŭračystaści 3 Lipienia. Alaksandr Łukašenka pryniaŭ parad, Kola razam ź im, taksama ŭ pahonach hałoŭnakamandujučaha. Pieršaja z zapłanavanych akcyj internet-apazicyi nie adbyłasia.

Kala steły sabrałasia zusim mała publiki. Praz małuju kolkaść publiki prajści na placoŭku pierad trybunaj možna było zusim svabodna. Tudy trapili reparciory «Našaj Nivy». Pratesty nie adbylisia: krytyčnaja masa pratestujučych prosta nie nabrałasia.

Litaralna da kožnaj hrupki moładzi pryładziŭsia cichar u cyvilnym. Pry najmienšych padazreńniach u niełajalnaści cichary brali ludziej pad łokci i vyvodzili. Takoje ŭražańnie, što kolkaść cicharoŭ była paraŭnalnaja z kolkaściu śviatkujučych.

Małalikaść publiki možna patłumačyć jak drennym nadvorjem zranku, tak i bojaźziu ludziej trapić u zavarušku, a taksama ahulnaj apatyjaj hramadstva.

Minsk, jahonyja parki i praśpiekty, u cełym 3 Lipienia stajać pa-letniamu apuściełyja, tolki čyrvona-zialonyja štandary šarhaciać na vietry.

Uranku mocny doždž išoŭ da 11.00. Paśla abiedu ad 14.00 iznoŭ zadaždžyła.

13.23

BT skončyła tranślacyju paradu i śviata.

13.20

Dziaŭčynka ŭračysta ŭručyła kvietki Alaksandru Łukašenku «ad imia ŭdzielnikaŭ paradu». U hety momant fizkulturniki ŭnieśli na praśpiekt hihancki čyrvona-zialony ściah. A ŭ nieba vypuścili sotni čyrvonych i zialonych šarykaŭ.

13.10

Dziejstva kamientuje pafasnym hołasam televiadučy. Navat na nabližeńniach telekamier BT narod naziraje za ŭsim apatyčna i biez entuzijazmu. Ludzi namučylisia, bo im pryjšłosia pryjści na parad zranku i stajać čakać pad daždžom. Tym časam na praśpiekcie tancory źmianili kikbaksioraŭ. Paśla vyjechali traktary.

12.59

Narod, jaki sabrali na parad, razychodzicca. Sychod pačaŭsia adrazu paśla taho, jak Łukašenka skončyŭ vystup, a pilnaść asobaŭ u cyvilnym źniziłasia.

12.54

Uračystaje šeście pracoŭnych i spartoŭcaŭ adkryvaje siamja Jarmolenkaŭ. Anatol Jarmolenka, jahonaja dačka Alesia i ŭnuk Tola vykonvajuć pieśniu pa-rasiejsku «Dień Osvoboždieńja» i papury z savieckich piesień.

12:53

Pačynajecca spartyŭna-maładziožnaje dziejstva.

12:52

Zvodny arkiestr Uzbrojenych sił vykanaŭ pieśniu pa-biełarusku «Pad čystym niebam».

12.40

Paradam prajšli vajskoŭcy i vajskovaja technika. Sioleta nad horadam pralacieła i bajavaja avijacyja.

12.20

Pavodle tradycyi, parad adkryli junyja navučency-suvoraŭcy.

12.18

Nie mienš za 3 čałavieki zatrymali ŭ rajonie hatela «Płanieta» Jany pačali chłopać u časie vystupu Alaksandra Łukašenki. Śviedkam hetaha byŭ reparcior «Našaj Nivy».

Litaralna da kožnaj hrupki moładzi pryładziŭsia cichar u cyvilnym. Pry najmienšych padazreńniach u niełajalnaści cichary biaruć ludziej pad łokci i vyvodziać. Uvohule, takoje ŭražańnie, što cicharoŭ nie mienš, čym śviatkujučych.

12.13

Pratestami navat i nie pachnie, paviedamlajuć reparciory «Našaj Nivy». Ale nichto nie słuchaje i Łukašenku. Ludzi, što sabralisia na parad, zaniatyja svaimi spravami.

12.10

Nivodzin čałaviek pobač sa mnoj nie zachłopaŭ i nie pačaŭ ničoha kryčać paśla pačatku vystupu Łukašenki, paviedamlaje reparcior «Našaj Nivy».

12.07

Hienierał-lejtenant Žadobin dałažyŭ Łukašenku pra hatoŭnaść da paradu. Pačaŭsia vystup Łukašenki.

12.05

Hienierał-lejtenant Žadobin abjazdžaje vojski i vinšuje z Dniom Niezaležnaści. Vojski adkazvajuć: «Ura!».

12.00

U adkrytaj mašynie — ministr abarony Juryj Žadobin, jaki prymaje parad. U druhoj mašynie — kamandujučy paradam hienierał-major Puzikaŭ. Hučyć uračystaja muzyka. Pačynajecca abjezd vojskaŭ.

11.59

Na parad prybyŭ Alaksandr Łukašenka z Kolem. Łukašenka — u mundziry hałoŭnakamandujučaha. Vitali Łukašenku vielmi strymana. «O, Koleńka!» — prabiehła pa šerahach, kali vyjšaŭ chłopčyk.

11.57

Reparcior «Našaj Nivy» pačuŭ pa racyi pieramovy milicyjantaŭ. U ich paviedamlałasia, što jość pieršyja zatrymanyja.

11.55

Na BT pačałasia žyvaja tranślacyja z paradu. Pry zdymkach źvierchu vidać, što ludziej sabrałasia niahusta. Nie bolš za niekalki tysiač čałaviek.

11.55

Hledačam razdajuć dziaržaŭnyja ściažki.

11.50

Nasuprać steły Horada-hieroja sabrałasia kala 5000 čałaviek. Na dumku reparciora «Našaj Nivy», bolšaść składajuć svajaki ŭdzielnikaŭ paradu. Atmaśfiera raźniavolenaja. Siarod ludziej chodziać supracoŭniki siłavych struktur u cyvilnym. Prapuskajuć ludziej davoli libieralna. Možna prajści navat z zaplečnikami.

11.25

Kala punktaŭ propusku i ŭzdoŭž trasy ruchu paradu — niečuvanaja kancentracyja śpiecnazaŭcaŭ i siłavikoŭ u cyvilnym.

11.18

Kala punktaŭ propusku sabralisia hihanckija čerhi. Sotni ludziej stajać u čerhach jak z boku Niamihi, kala Pałaca sportu, tak i z boku hatela «Płanieta», i na moście cieraź Śvisłač na praśpiekcie Mašerava (byłoj vulicy Varvašeni). Nadhlad adbyvajecca marudna.

10.57

U Minsku skančajecca doždž, nieba jaśnieje, u centr horada pačynaje ściakacca narod. Łukašenkaŭcy pa zaprašalnikach zapaŭniajuć trybuny pierad stełaj horada-hieroja. Pieršy kanał łukašenkaŭskaha telebačańnia ŭ navinach daŭ niekalki chvilin žyvoj tranślacyi ź placoŭki paradu. Žyvaja tranślacyja paradu maje raspačacca ab 11.55.

* * *

Zavadatary akcyi «Revalucyja praz sacyjalnuju sietku» zaklikali prychilnikaŭ pieramien sabracca na čas paradu i «šeścia pracoŭnych kalektyvaŭ» kala steły «Minsk — horad-hieroj», dzie buduć prachodzić asnoŭnyja aficyjnyja mierapryjemstvy.

Pratestoŭcy źbiralisia ŭ časie vystupu Łukašenki plaskać u dałoni.

Reparciory «Našaj Nivy» buduć dziažuryć u roznych punktach horada.

Druhaja sustreča ŭdzielnikaŭ «Revalucyi praz sacyjalnuju sietku» maje adbycca, a 19-j viečara — jaje miesca maje być abvieščana, a 18-j u sacyjalnych sietkach.

Treci etap — sustreča kala abieliska «Minsk — horad-hieroj» (steła) a 23:00 u čas salutu.

Dahetul «Revalucyja praz sacyjalnyja sietki» praviała čatyry akcyi, što prachodzili pa sieradach (8, 15, 22 i 29 červienia) u bolš čym 50 haradach Biełarusi.

Hetyja akcyi stali viadomyja pad nazvaj «Viečary apładysmientaŭ», kali ludzi vychodzili na płoščy svaich haradoŭ biez łozunhaŭ i skandavańniaŭ, reahujučy na situacyju apładysmientami. Akcyi 22 i 29 červienia byli žorstka razahnanyja śpiecnazam i ludźmi ŭ cyvilnym. Tak, 22 červienia ŭ krainie było zatrymana kala 560, a 29 červienia — kala 240 čałaviek. Udzielniki akcyi źviedali štrafy i administracyjny aryšt.

2 lipienia administratary sietki Vkontaktie zabłakavali asnoŭnuju staronku «Revalucyi praz sacyjalnyja sietki».

Kali zajści na staronku hrupy, to ŭbačycie tolki abjavu: «Hrupa časova zabłakavanaja i praviarajecca administratarami, bo niekatoryja karystalniki miarkujuć, što jana nie adpaviadaje praviłam sajta». Błakavańnie adbyłosia pamiž 10.00 i 11.00 u subotu 2 lipienia.

Administratary hrupy RPSS miarkujuć, što za banam stajać biełaruskija śpiecsłužby. Jany śćviardžajuć, što zadumanyja pratesty nosiać mirny, lehitymny charaktar i adpaviadajuć kanstytucyjnamu pravu na svabodu schodu i mierkavańnia. Viačasłaŭ Dzijanaŭ, adzin z zavadataraŭ pratestu, na svaich staronkach Vkontaktie zaklikaje ŭsich aktyvistaŭ ustrymacca ad vykarystańnia simvoliki i paźbiahać kanfliktaŭ.

Tym časam błakavanyja i niekatoryja inšyja, nie takija šmatlikija hrupy Vkontaktie, jakija mieli antyłukašenkaŭskuju nakiravanaść.

Hrupa «Revalucyja praz sacyjalnyja sietki» na momant błakavańnia naličvała kala 20 tysiač siabroŭ.

Na praciahu červienia na zaklik supolnaści «Revalucyja praz sacyjalnyja sietki» ludzi vychodzili na centralnyja płoščy haradoŭ kožnuju sieradu, a 19-j i prosta hulali.

Adnak ideja spadabałasia svajoj prostaściu. I 15 červienia ŭ centr Minska vysypała stolki ludziej, što napałochanyja ŭłady zakryli dla vychadu stancyi mietro «Kupałaŭskaja» i «Kastryčnickaja» i zabłakavali turnikietami płoščy Kastryčnickuju i Svabody.

U Minsku najbolšaja akcyja adbyłasia 22 červienia, u joj uziali ŭdzieł niekalki tysiač pratestoŭcaŭ. U Homieli, Breście i Hrodnie — 29 červienia, z udziełam socień ludziej.

Lidary apazicyi padtrymali pratestoŭcaŭ.

Adznačać 3 Lipienia jak dziaržaŭnaje śviata pačali ad 1996 hoda. U hety dzień u 1944 hodzie savieckija vojski zaniali Minsk.

• 0
• 0
• 0
• 0
• 0
• 0
• 0
• 0