Prakuratura: Lepier zabiŭ siabie z pryčyny «finansavych prablem»

Cieła Andžeja Lepiera znajšli ŭčora ŭviečary ŭ varšaŭskim ofisie partyi «Samaabarona», jakuju jon stvaryŭ 11 hadoŭ tamu i jakoj uvieś hety čas kiravaŭ. Pavodle śledčych, palityk paviesiŭsia ŭ piatnicu pamiž 8:30 i 12 hadzinaj, pryčym udzieł trecich asobaŭ pradstaŭniki prakuratury vyklučyli.

Siońnia, a 13-j pavodle minskaha času varšaŭskaja prakuratura aficyjna paćvierdziła fakt samahubstva, adznačyŭšy, što papiaredniaja i pakul adzinaja viersija — heta finansavyja kłopaty Lepiera. Śledčyja paviedamili taksama, što pamierły nie pakinuŭ pieradśmiarotnaha lista.

Andžej Lepier zrabiŭsia viadomy na pačatku 90-ch, kali razam sa svaimi kalehami-fiermierami pačaŭ błakavać darohi dy dziaržaŭnyja ŭstanovy na znak pratestu suprać raptoŭnaha padaražańnia kredytaŭ na sielhasmašyny dy ŭvohule palityki ŭradu ŭ halinie sielskaj haspadarki.

U 2000 hodzie Lepier zasnavaŭ partyju «Samaabarona Rečypaspalitaj», jakaja ŭžo ŭ nastupnym hodzie uvajšła ŭ parłamient. Andžej Lepier na pačatku byŭ vice-śpikieram Siejmu, a potym, paśla padpisańnia «Samaabaronaj» pahadnieńnia ab kaalicyi z partyjami «Prava i spraviadlivaść» dy «Liha polskich siemjaŭ» staŭ vice-premjeram i ministram sielskaj haspadarki.

Adnak ŭ 2007 hodzie paśla niekalkich surjoznych skandałaŭ ź Lepieram u hałoŭnaj roli, kaalicyja raspałasia i byli abvieščanyja daterminovyja vybary, u vyniku jakich «Samaabarona» nie atrymała patrebnych 5% hałasoŭ, kab patrapić u parłamient.

Mierkavańni nakont roli Lepiera ŭ polskaj palitycy padzielenyja. Adnyja ličyli jaho trybunam, zmaharom za pravy pakryŭdžanych, inšyja i takich značna bolej, ćvierdziać, što jon pahoršyŭ standarty polskaha parłamientaryzmu, uvioŭšy vuličnyja zvyčki dy movu ŭ zału pasiedžańniaŭ Siejmu.

Andžej Lepier apošnim časam byŭ pa-za hałoŭnymi padziejami palityčnaha žyćcia Polščy. Paviedamlajecca, što sioleta ŭviesnu jon zasnavaŭ firmu, jakaja pavinna była zajmacca uviadzieńniem polskaha biznesu na biełaruski rynak. Jak viadoma, Andžej Lepier nieadnarazova naviedvaŭ Biełaruś, u tym liku i ŭ časie vybaraŭ, i chvaliŭ palityčny ład, što panuje ŭ našaj krainie.

U žniŭni 2000 hoda Lepier zajaviŭ navat, što paprosić palityčnaha prytułku ŭ Biełarusi, kali sud nie spynić spravu suprać jaho za błakady darohaŭ. Praź niekalki hadoŭ palityk pryznaŭsia, što heta byŭ žart.

Andžeju Lepieru było 57 hadoŭ. U jaho zastalisia žonka, dźvie dački i chvory syn.

• 0
• 0
• 0
• 0
• 0
• 0
• 0
• 0