Ministr Hałavanaŭ praciahvaje svaju hniusnuju spravu

Paśla taho jak Ministerstva justycyi vyniesła pradstaŭleńnie ab daterminovym adklikańni staršyni Minskaj haradskoj kalehii advakataŭ Alaksandra Pylčanki, 2 vieraśnia jon napisaŭ zajavu ab spynieńni svaich paŭnamoctvaŭ na hetaj pasadzie. Abmierkavańnie pradstaŭleńnia Miniusta i zajavy advakata adbudziecca na ahulnym schodzie siabraŭ kalehii, pryznačanym na 24 vieraśnia. Varta adznačyć, što z boku ministerstva heta ŭžo nie pieršaja sproba cisku na kiraŭnika advakackaj kalehii.

Tak, 18 lutaha 2011 hoda na padstavie zahadu ministra justycyi Hałavanava Alaksandr Pylčanka byŭ vyklučany sa składu Kvalifikacyjnaj kamisii pa pytańniach advakackaj dziejnaści. Mienavita hetaja kvalifikacyjnaja kamisija prymała rašeńnie ab pazbaŭleńni advakataŭ, jakija ŭdzielničali ŭ palityčnych pracesach. Ale Alaksandr Pylčanka asabista ni razu nie prysutničaŭ na takich pasiedžańniach kamisii.

Vyviadzieńnie sa składu kamisii było ažyćcioŭlena ŭ toj ža dzień, kali jon u intervju BiełaPAN zajaviŭ, što kiraŭnictva Minskaj haradskoj kalehii advakataŭ ličyć, što ŭ Biełarusi skłałasia krytyčnaja situacyja, jakaja realna pahražaje niezaležnaści advakatury.

Nahadajem, što ŭ hetym hodzie pazbaŭleny licenzii advakaty Tamara Sidarenka, jakaja baraniła Uładzimira Niaklajeva, Uładzimir Toŭścik i Tamara Harajeva, jakija baranili Irynu Chalip, Aleh Ahiejeŭ, jaki baraniŭ Alesia Michaleviča, jahonaja žonka advakatka Zaryna Zaleŭskaja, advakatka Taćciana Ahiejeva, jakaja taksama ŭdzielničała ŭ vytvorčaści śledčych dziejańniaŭ pa hetaj kryminalnaj spravie. Advakat Pavieł Sapiełka, jaki baraniŭ Andreja Sańnikava, byŭ vyklučany sa składu Minskaj haradskoj kalehii advakataŭ pa pradstaŭleńni taho samaha Miniusta.

Taksama raniej u chodzie razhladu na pasiadžeńniach pazačarhovych atestacyjnych kamisij nie byli atestavany advakaty, jakija ŭdzielničali ŭ spravie pa padziejach 19 śniežnia 2011 hoda - Darja Lipkina, jakaja baraniła Mikitu Lichavida, Hanna Bachcina, jakaja baraniła Irynu Chalip, a taksama Iryna Burak, jakaja baraniła Alaksandra Kłaskoŭskaha i Anatola Labiedźku. Pazicyja hetych advakataŭ zvodziłasia da poŭnaha apraŭdańnia ich padabaronnych. Razam z tym rašeńnie kvalifikacyjnaj kamisii pa pytańniach advakackaj dziejnaści ab pazbaŭleńni ich licenzii pa ich nie prymałasia.

Takim čynam, kolkaść advakataŭ, jakija źviazany tym ci inšym čynam z kryminalnaj spravaj ab padziejach 19 śniežnia i byli pazbaŭlenyja mahčymaści ažyćciaŭlać prafiesijnuju dziejnaść pa inicyjatyvie Ministerstva justycyi Respubliki Biełaruś, dasiahnuła siami čałaviek. Taksama vielmi vialikaja kolkaść advakataŭ, jakija ŭdzielničali ŭ hetaj spravie i jakija padvierhlisia cisku z boku Ministerstva justycyi ŭ chodzie šmatlikich pravierak i rabot atestacyjnych i kvalifikacyjnych kamisij. Viadoma, što nie mienš za šeść advakataŭ byli atestavanyja ŭsiaho na hod. Jość vypadki prypynieńnia dziejańnia advakackich licenzij na roznyja terminy.

• 0
• 0
• 0
• 0
• 0
• 0
• 0
• 0