Usich biełaruskich niemaŭlat, narodžanych 31 kastryčnika, pryznajuć 7-miljardnymi
Jany atrymajuć pamiatnyja siertyfikaty.
Pamiatnyja siertyfikaty siamimiljardnaha žychara Ziamli atrymajuć usie małyja, narodžanyja ŭ Biełarusi 31 kastryčnika.
Zhodna z prahnozam AAN, 31 kastryčnika 2011 čałaviectva pieraadoleje čarhovuju histaryčnuju miažu — nasielnictva Ziamli dasiahnie adznaki ŭ 7 młrd čałaviek. Uračystyja mierapryjemstvy, prymierkavanyja da Dnia siami miljardaŭ, projduć pa ŭsim śviecie.
Pradstaŭnictva AAN u Biełarusi sumiesna ź Ministerstvam pracy i sacyjalnaj abarony i pry padtrymcy Ministerstva achovy zdaroŭja 31 kastryčnika praviadzie akcyju, meta jakoj — pryciahnuć uvahu hramadskaści, srodkaŭ masavaj infarmacyi da važnaści demahrafičnych prablem u krainie i śviecie, padkreślić asablivuju značnaść kožnaha čałavieka.
Kiraŭniki ministerstvaŭ pracy i sacyjalnaj abarony, achovy zdaroŭja i pradstaŭnik AAN u Biełarusi Antonius Bruk naviedajuć radzilnaje adździaleńnie RNPC «Maci i dzicia». Jany pavinšujuć mam, čyje małyja źjavilisia na śviet u Dzień siami miljardaŭ, i ŭručać im pamiatnyja siertyfikaty i padarunki.
U hety ž dzień inšaja delehacyja naviedaje radzilny dom u Barysavie. Vinšavańni, siertyfikaty i padarunki ad pradstaŭnikoŭ Ministerstva achovy zdaroŭja, dypłamatyčnych misij i kiraŭnikoŭ ahienctvaŭ sistemy AAN u Biełarusi atrymajuć mamy niemaŭlat, jakija naradzilisia ŭ Dzień siami miljardaŭ.
Kamientary