Ekśpierty prahnazujuć nulavy rost ekanomiki

Tak, na dumku kiraŭnika analityčnaha centra «Stratehija» Leanida Zaiki, uładam nie varta aryjentavacca na rost VUP na ŭzroŭni 5,5%. «Lepš za ŭsio, kab byŭ nulavy rost abo navat padzieńnie VUP na 5–7%», — zaznačyŭ jon na sustrečy z žurnalistami ŭ Minsku 29 śniežnia.

Zaika ŭpeŭnieny ŭ nieabchodnaści admovicca ad prahnazavańnia inflacyi na nastupny hod. «Treba najpierš dakładna vyznačyć stan hrašovaj masy», — padkreśliŭ ekśpiert.

Što tyčycca zarpłaty, to, na dumku ekanamista, jaje rost pavinien być nie abaviazkovym, a rekamiendavanym pakazčykam, pryčym u zaležnaści ad halinaŭ.

«A ŭvohule rabić prahnozy pa Biełarusi na 2012 hod lepš za ŭsio atrymałasia b nie ŭ ekanamistaŭ, a ŭ psichijatraŭ, — skazaŭ Zaika, namiakajučy nie niepradkazalnaść dziejańniaŭ biełaruskich uładaŭ. — Prezident jasna skazaŭ, što my stvarajem Adzinuju ekanamičnuju prastoru i nie viedajem, jak heta rabić. Jany prydumvajuć, što im rabić».

U svaju čarhu kiraŭnik Navukova-daśledčaha centra Miziesa Jarasłaŭ Ramančuk zajaviŭ: rabić dakładnyja prahnozy, asabliva ŭ častcy źmieny tych ci inšych pakazčykaŭ, u Biełarusi ciažka. «Nijakija ekanamičnyja raźliki nie pracujuć. Tamu prahnozy — heta taki ekanamičny haraskop, uhadajka», — miarkuje ekśpiert.

Zychodziačy z ułasnych adčuvańniaŭ, Ramančuk ličyć, što inflacyja ŭ 2012 hodzie składzie pryblizna 50–60%, rost VUP budzie na ŭzroŭni nula, a kurs rubla na kaniec hoda — prykładna 13–14 tysiač rubloŭ za dołar.

Zołatavalutnyja reziervy, pavodle aptymistyčnaha scenaryja, zachavajucca na ŭzroŭni 2011 hoda (pryblizna 7 młrd. dołaraŭ), pavodle piesimistyčnaha — skarociacca na 2–3 młrd. dołaraŭ.

Realnaja siaredniaja zarabotnaja płata pa krainie, jak miarkuje Ramančuk, źmienšycca na 10% u paraŭnańni z hetym hodam.

Što tyčycca źniešniaha handlu, to ekśpiert prahnazuje rost ekspartu maksimum na 10%. «A na stanoŭčaje salda my možam vyjści tolki pry ŭmovie prodažu naftapraduktaŭ na źniešnich rynkach biez vypłaty pošliny ŭ rasijski biudžet», — upeŭnieny jon.

Mnohaje, na dumku Ramančuka, budzie zaležać ad upłyvu na ekanomiku naftavych i hazavych pahadnieńniaŭ z Rasijaj. «Ale pakazčyki, što zakładzieny ŭ asnoŭnych kirunkach hrašova-kredytnaj palityki, vykanany nie buduć», — nie sumniavajecca jon.

Ekanamist Siarhiej Čały spadziajecca, što ŭłady admoviacca ad vykanańnia prahnozu pa roście VUP na 2012 hod. «Spadziajusia, hetym nichto zajmacca nie budzie. Dumaju, tyja, chto adkazvaje va ŭradzie za manietarny i biudžetny błok, razumiejuć ryzyki i nie daduć zrabić toje, što možna nazvać ekanamičnym samazabojstvam», — padkreśliŭ jon.

2012 hod, na dumku Čałaha, budzie hetkim ža, jak i apošnija miesiacy 2011 hoda. «Budzie lažańnie na samym dnie, ekanamičny rost — blizu nula, rost dachodaŭ nasielnictva taksama blizu nula», — prahnazuje Čały.

Što tyčycca kursu rubla, to prahnoz Nacbanka pa siaredniehadavym abmiennym kursie (9.150 rubloŭ za dołar) jon ličyć piesimistyčnym. «Kali ŭłady ničoha nie buduć vydumvać, my ŭbačym umacavańnie nacyjanalnaj valuty ŭ realnym vyražeńni», — miarkuje ekśpiert.

• 0
• 0
• 0
• 0
• 0
• 0
• 0
• 0