16‑hadovaja Naścia Pałažanka, siabra niezarehistravanaj arhanizacyi «Małady front», apynułasia pierad pahrozaj vyklučeńnia z fizika‑matematyčnaha kłasa adnoj z minskich himnazij.
Aktyvistka była zatrymana supracoŭnikami KDB 4 lutaha padčas pasiadžeńnia Centralnaj rady «Maładoha frontu» na pryvatnaj kvatery ŭ Minsku — razam ź jašče 28 inšymi liderami rehijanalnych i minskich rajonnych arhanizacyj. Paśla šmathadzinnych dopytaŭ, padčas jakich na kvaterach niekatorych maładafrontaŭcaŭ adbyvalisia pieratrusy, usie zatrymanyja byli vyzvaleny, akramia lideraŭ «Maładoha frontu» Dzmitryja Fiedaruka i Aleha Korbana. Praz troje sutak i ich adpuscili pad padpisku ab niavyjeździe, chacia suprać maładych chłopcaŭ uzbudžany kryminalnyja spravy pa artykule 193‑1 — dziejnaść ad imia niezarehistravanaj arhanizacyi.
8 lutaha kiraŭnictva siaredniaj škoły №73 praviało tak zvany «saviet prafiłaktyki», na jakim było pryniata rašeńnie padać dakumienty na dziaŭčynu ŭ inśpiekcyju pa spravach niepaŭnahadovych. «Ale pastavić mianie na ŭlik nie majuć prava — na mianie niama nivodnaha pratakoła ab pravaparušeńniach», — skazała dziaŭčyna «Narodnaj voli».
U samoj škole ad kamientaryjaŭ admaŭlajucca. Ale «pa sakrecie» nastaŭniki skazali, što Nasci pahražaje pieravod z fizika‑matematyčnaha kłasa ŭ zvyčajny. Pry ŭsim tym Naścia Pałažanka maje ŭ svaim aktyvie vydatnyja acenki, jana šmatrazovy ŭdzielnik alimpijad i dyscyplinavanaja vučanica.
Ciapier čytajuć
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie6
Kamientary