Siońnia pravaabaronca, žurnalist, były deputat Viarchoŭnaha Savieta 13-ha sklikańnia Valer Ščukin adznačaje 70-hodździe.
Valer Ščukin 27 hadoŭ prasłužyŭ u vajenna-marskim flocie, potym pracavaŭ mašynistam krana-trubaŭkładčyka. U palityku pryjšoŭ u 1995 hodzie, kali ŭ jakaści člena Partyi kamunistaŭ Biełaruskaj abraŭsia deputatam Viarchoŭnaha Savieta 13-ha sklikańnia (u 1998 hodzie byŭ vyklučany z šerahaŭ hetaj partyi).
Padčas kanstytucyjnaha kryzysu vosieni 1996-ha Valer Ščukin staŭ na bok abaroncaŭ Kanstytucyi, padpisaŭ zvarot ab impičmiencie Łukašenku, udzielničaŭ u sprobach viarnuć Viktara Hančara ŭ kabiniet staršyni Centralnaj vybarčaj kamisii.
Valer Ščukin aktyŭna drukujecca ŭ niezaležnaj presie, zajmajecca pravaabarončaj dziejnaściu. Za svaju hramadzianskuju pazicyju nieadnarazova padviarhaŭsia sudovamu pieraśledu, maje niekalki dziasiatkaŭ administracyjnych aryštaŭ i try kryminalnyja prysudy.
Letaś milicyja zatrymała ludziej, jakija pryjechali pavinšavać Valera Ščukina z dniom naradžeńnia, a taksama samoha Ščukina, tamu sioleta jon vyrašyŭ śviatkavać 70-hodździe ŭ Vilni.
Kamientary