Dahetul niajasna: ci to byŭ sapraŭdny terakt, ci to vučeńni, ci to vybuch u ramkach vučeńniaŭ.
U niadzielu 22 krasavika dziaržaŭnyja telekanały prademanstravali videazapis, zrobleny ŭ adnoj z homielskich kramaŭ u momant vybuchu, pa fakcie jakoha KDB zavioŭ kryminalnuju spravu.
Vybuchovaje prystasavańnie było schavanaje kala kasy. Na toj momant kasirka raźličvała dvuch klijentaŭ, adzin ź jakich byŭ z maleńkim chłopčykam. Kasirka raskazała, što vybuch byŭ słaby, niby ad pietrady.
Homielski sajt Odsgomel.org paviedamlaje, što, mahčyma, vybuch adbyŭsia ŭ nievialikaj kramie «Viosny». Mienavita kala jaje 19 krasavika byli zaŭvažanyja mašyny śpiecyjalnych słužbaŭ i «chutkaj». Pa słovach karespandenta sajta, adzin ź milicyjantaŭ kala toj kramy patłumačyŭ, što tut iduć vučeńni. Paźniej supracoŭniki Odsgomel.org paraŭnali interjer «Viosnaŭ» z kramaj, pakazanaj u vypuskach navin na dziaržaŭnych telekanałach, i pryjšli da vysnovy, što heta najchutčej adna i taja ž ustanova.
Biełaruskija infarmaahienctvy paviedamili pra zaviedzienuju pa fakcie vybuchu ŭ adnoj z homielskich kramaŭ kryminalnuju spravu.
«Kryminalnaja sprava pa prykmietach złačynstva, skład jakoha praduhledžany č.1 st.290 KK Respubliki Biełaruś (pahroza aktam teraryzmu) raspačata ŭpraŭleńniem KDB Biełarusi pa Homielskaj vobłaści.
Padstavaj dla raspačynańnia kryminalnaj spravy źjaviŭsia fakt pryviadzieńnia ŭ dziejańnie 19 krasavika 2012 u 13.58 samarobnaj pryłady dla ažyćciaŭleńnia dziejańniaŭ terarystyčnaj nakiravanaści ŭ handlovaj zale adnoj z kram u centralnaj častcy Homiela», — zajaviła žurnalistam pres-hrupa Upraŭleńnia KDB Biełarusi pa Homielskaj vobłaści.
Atrymanyja apieratyŭnyja dadzienyja, a taksama elemienty samarobnaj pryłady, inšyja prykmiety stali padstavaj dla adpracoŭki viersii ab «razborkach» pamiž arhanizatarami kanałaŭ nielehalnaj mihracyi ź liku zamiežnych hramadzian, jakija prybyvajuć pad vyhladam navučańnia ŭ VNU Homiela, paviedamlajuć u pres-hrupie.
Varta adznačyć, što na sajcie KDB pra kryminalnuju spravu nie paviedamlajecca. Ale pry hetym sajt kamitetu źmiaščaje anons mižviedamasnych kamandna-štabnych vučeńniaŭ pa temie «Arhanizacyja i ažyćciaŭleńnie mier dziaržaŭnaha reahavańnia na akty teraryzmu».
Zhodna paviedamleńnia, jany musili adbycca akurat 19 krasavika i akurat u Homieli. U anonsie, miž inšym, adznačajecca, što «aktualnaść prablemy terarystyčnaj pahrozy źviazana z aktyvizacyjaj sprob arhanizacyi kanałaŭ niezakonnaj pierapraŭki praz terytoryju Respubliki Biełaruś u krainy Jeŭrasajuza vychadcaŭ z krain ź niespryjalnaj ŭ mihracyjnym płanie stanoviščam, u tym liku tych, chto prachodzić pa ulikach ryzyka-prahnozaŭ terarystyčnaj nakiravanaści».
Źviartaje na siabie ŭvahu i taki momant: incydent u Homieli adbyŭsia nieŭzabavie paśla źjaŭleńnia infarmacyi pra mahčymyja źmieny ŭ arhanizacyi pracy na zachodniaj miažy Biełarusi ŭ adkaz na sankcyi z boku ES. 18 krasavika pa presie razyšłosia paviedamleńnie krynicy ŭ Dziaržaŭnym pahraničnym kamitecie pra toje, što, uličvajučy ciapierašniuju situacyju, biełaruskaje pahranviedamstva pierachodzić da ažyćciaŭleńnia achovy miažy ŭ palehčanym režymie.
«A 4‑j hadzinie nočy my zrazumieli, što sierviery prosta vyčyščanyja». Jarasłaŭ Ivaniuk raskazaŭ padrabiaznaści pra ataku na anłajn-biblijateku «Kamunikat»99
Kamientary