Nieviadomyja zabaŭki na letnija vychodnyja

Zachodniaja industryja adpačynku prynosić biełarusam usio novyja i novyja atrakcyjony. «Naša Niva» daje parady, jak cikava pravieści vychodnyja — vyjści suchim z vady, abjechać usie słavutyja miescy horada za paŭhadziny i paspaborničać na śmiešnych mašynach.

Akvazorbinh

Jašče ŭ kancy minułaha stahodździa ŭ Francyi i Novaj Ziełandyi miascovyja ekstremały vynajšli sabie novuju zabaŭku — zorbinh. Jany skatvalisia z horak u vialikich prazrystych i miakkich šarach. Padčas takoha spusku atrymać traŭmu było amal niemahčyma. Ź ciaham času technałohija ŭdaskanalvałasia i vykarystoŭvałasia ŭsio šyrej — spusk sa śniežnych schiłaŭ, padarožža ŭnutry aeratruby…

Najbolš prostym, a tamu i papularnym, akazaŭsia mienavita akvazorbinh — bieh u šarach pa vadzie. Na pavierchni voziera trymajecca vialiki šar, unutry jakoha znachodzicca jašče adzin šar, ale mienšy. Miž imi — pavietra, jakoje nie daje kanstrukcyi patanuć. Unutr zapuskajuć adnaho ci dvuch čałaviek, jakija sprabujuć utrymacca na pavierchni i nie zvalicca na radaść raziavakam.

Niekalki takich šaroŭ u soniečnaje nadvorje zna-chodzicca na plažy № 3 Minskaha mora (Zasłaŭskaha vadaschovišča). Košt prakatu składaje 30–40 tysiač rubloŭ za piać chvilin. Jość takaja zabava i ŭ parku imia Horkaha.

Siehvej

Pryładaj, jakaja maje niešta ad skutara, a niešta ad samakata, čaściakom karystajucca na fabrykach, składach ci ŭ hipiermarkietach. Za košt ubudavanaha akumulatara aparat ruchajecca z chutkaściu kala 10–20 km/h i pieraŭtvaraje minaka ŭ kiroŭcu, jakomu nie treba prykładać lišnich namahańniaŭ, kab pierasoŭvacca pa pamiaškańni.

Kiravać siehvejem nieskładana. Aparat nabiraje chutkaść, kali jazdok nachilajecca ŭpierad. Dla taho, kab zatarmazić, adpaviedna, treba adchilicca nazad. Śpiecyjalnaj ručkaj možna pavaročvać naleva i naprava.

Padarožžy na siehvejach papularnyja ŭ zachodnich haradach. Turysty mohuć chutka ahledzieć vartyja ŭvahi miaściny, nie karystajučysia dla pierajezdu hramadskim transpartam. Manieŭranaść dazvalaje lohka abjazdžać minakoŭ, a pry patrebie siehvej možna ŭziać z saboj i ŭ mietro ci ŭ aŭtobus.

Kožny taki aparat kaštuje $4–5 tysiač. U Minsku prakatam siehvejaŭ zajmajucca kala Pałaca sporta. Košt składaje ad 20 tysiač rubloŭ za 5 chvilin da 180 tysiač za hadzinu katańnia.

Ekstremalnyja honki

Na postsavieckaj prastory pad kvadracykłami razumiejuć čatyrochkołavyja adkrytyja ŭsiudychody dla amataraŭ ekstremalnaha adpačynku. Piasok, pole, hraź — dla takich mašyn padychodzić ledź nie lubaja pavierchnia.

20-kiłamietrovy tur na kvadracykłach za miežy Minska ad kampanii «ATV-prakat» kaštuje $40. Hetaja adlehłaść prajazdžajecca za paŭtary hadziny. Tur pačynajecca z vulicy Skaryny za Nacyjanalnaj biblijatekaj. Minimalny ŭzrost padarožnika — 16 hadoŭ.

Jašče adzin vid aŭtamabilaŭ -bahi — možna arandavać u adnajmiennym centry, jaki pracuje ŭ rajonie stadyjona «Zara» pamiž staličnymi mikrarajonami Uručča i Zialony Łuh. Jon prapanuje zajezdy na śmiešnych aŭtamabilach-usiedarožnikach pa piasčanaj trasie, pryčym paśviedčańnia kiroŭcy dla hetaj zabaŭki nie treba. Košt dvuch piacichvilinnych zajezdaŭ składaje 180 tysiač rubloŭ.

• 0
• 0
• 0
• 0
• 0
• 0
• 0
• 0