Scenarystam i režysioram unikalnaha dakumentalnaha filmu «Staryja instrumenty Biełarusi» staŭ daśledčyk nacyjanalnych instrumentaŭ Źmicier Sasnoŭski, lider hurta «Stary Olsa».
Dakumientalny film «Staryja instrumienty Biełarusi» pretenduje stać padručnikam pa historyi biełaruskich muzyčnych instrumientaŭ ci ich encykłapiedyjaj. Jaho scenarystam i režysioram staŭ daśledčyk nacyjanalnych instrumientaŭ Źmicier Sasnoŭski, lider hurta «Stary Olsa».
Kino vyjdzie ŭ prodaž na DVD paśla 20 krasavika. I budzie pradavacca licenzijnym nakładam u kramach pa‑biełarusku i pa‑anhlijsku. Stvaralniki źbirajucca padać film na konkurs kanałaŭ «Dyskavery» i «Nešnł Džeohrafik». Režysior Źmicier Sasnoŭski raspaviadaje pra stylistyku filma.
Źmicier Sasnoŭski: «Film vykanany ŭ stylistycy dakumientalnych filmaŭ kanała «Dyskavery». To bok jon składajecca ź siužetaŭ, u jakich pakazana, jak praktyčna vyrablajucca muzyčnyja instrumienty, siužetaŭ, dzie vykazvajucca ekśpierty, «łabaratornych» zdymkaŭ starych instrumientaŭ, jakija zachavalisia ŭ našych muziejach, i mastackich ilustracyj taho, pra što raspaviadajecca.
Naprykład, kali majstar‑lutnist Juryj Dubnavicki kaža pra vykarystańnie lutni ŭ pachodnym pobycie rycaraŭ, my pakazvajem rycyra ź lutniaj».
Film raspaviadaje pra piać instrumientaŭ: dudu, lutniu, liru, huśli i surmu. Jaho stvaralniki śćviardžajuć, što jon maje vialikuju navukovuju značnaść, bo raźviejvaje niekatoryja mify pra biełaruskija i niebiełaruskija muzyčnyja instrumienty i ŭtrymlivaje šmat rarytetnaj infarmacyi. Administratar karciny Jana Šydłoŭskaja raspaviadaje pra praces zdymak.
Jana Šydłoŭskaja: «My znajšli fotazdymak dudara, jakoha ŭzhadvali ŭ svaich pracach usie vybitnyja navukoŭcy, ale vyjavy nichto nie moh znajści. My znajšli jaje ŭ archivie kina‑ i fotamateryjałaŭ u Dziaržynsku, nam vielmi paščaściła. A ź cikavych momantaŭ...
Nam treba było prailustravać hraviuru Mahnusa, šviedskaha daśledčyka dudy. A hraviura hetaja ź miadźviedziem. I my brali jaho ŭ cyrku, zdymali ŭ parku, i dla ludziej heta było dziva: žyvy miadźviedź u parku».
Doŭžycca kino krychu mienš za hadzinu. Za hety čas hučać intervju z muzykami i daśledčykami, pakazvajecca praca majstroŭ, jakija stvarajuć instrumienty, vykarystoŭvajucca zapisy z kancertaŭ, ilustrujucca siaredniaviečnyja sceny.
Režysior kaža, što film «Staryja instrumienty Biełarusi» pryznačajucca nie tolki šyrokamu kołu hledačoŭ, ale i etnamuzykaznaŭcam.
Źmicier Sasnoŭski: «U biełaruskim etnamuzykaznaŭstvie doŭhi čas ničoha nie rabiłasia. Tamu hety film padniaŭ mnohija redkija pytańni. Naprykład, «dziakujučy» savieckim etnamuzykołaham, było mierkavańnie, što huślaŭ na Biełarusi nie było, niahledziačy na šmatlikija fakty.
My pryśviacili huślam asobnuju častku ŭ «Starych instrumientach Biełarusi». Naša aficyjnaja navuka paźbiahaje kantaktaŭ ź biełaruskimi majstrami i daśledčykami, jakija nie pracujuć na dziaržaŭnaj pracy, chacia jany zrabili šmat adkryćciaŭ u daśledavańni dudy. My ž u svaim filmie ich śviedčańni vykarystoŭvajem».
***
Film vyjdzie ŭ prodaž praz dva tydni, ale jaho prezientacyja adbudziecca 12 krasavika a 18 hadzin u Pałacy moładzi pa vulicy Staravilenskaj, 41.
Fota z sajtu «Staroha Olsy», fatohraf — A.Biełavusaŭ
Ciapier čytajuć
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja115
Kamientary