Vyratavać Arche

Pryčym nie tolki i nie stolki adnamu kankretna ŭziatamu čałavieku, a ŭsioj — i chaj adepty postmadernizmu darujuć mnie vysokija słovy — niezaležnaj biełaruskaj kultury. Na našych vačach metaskiravana i mietadyčna realizujecca płan źniščeńnia jak časopisa Arche, tak i niezaležnaha biełaruskaha knihavydańnia, jakoje voś užo šmat hadoŭ atajasamlivajecca mienavita z Bułhakavym.

«Spravaj Bułhakava» zanialisia padatkovaja, DFR i sumnyja hramadzianie z KDB.

Karaciej, kapajuć surjozna, nie pa-dziciačy.

Nie treba być Nastradamusam, kab pradkazać jaki ŭ historyi, što raźvivajecca takimi tempami, pavinien być łahičny kaniec… Dyk voś, kali tavaryšy, jakija zvykła ŭziali śled, z balšavickim zapałam taki daviaduć spravu da hetaha samaha łahičnaha kanca, heta moža demateryjalizavać ceły płast niezaležnaj biełaruskaj kultury. Bo

Valer Bułhakaŭ zajmaŭsia tym, čym pa sutnaści pavinna zajmacca narmalnaje Ministerstva kultury narmalnaj krainy. Dziakujučy jamu, dastupnymi stali rarytetnyja rečy, naprykład, słoŭniki biełaruskich dyjalektaŭ, pierakłady na biełaruskuju movu tvoraŭ zamiežnych aŭtaraŭ, pracy niesavieckich i kanfiskavanych u saviecki čas z aficyjnaha zvarotu aŭtaraŭ…

Zdavałasia b,

jakaja pahroza asabista Alaksandru Łukašenku (dy nie budziem zhadvać daremna imia jaho, bo artykułaŭ 367 i 368 Kryminalnaha Kodeksu RB nichto nie admianiaŭ) ad knihi «Biełaruskija havorki ŭ Krasłaŭskim rajonie Łatvii»?

Talent u RB pavinien navat nie słužyć, a ścipła prysłužvać. Talent pavinien viedać svajo miesca.

I tady jon moža vydavać słoŭniki i časopisy, stavić pastanoŭki i pisać pieśni.

Bułhakaŭ chacieŭ być «sam pa sabie». Chacieŭ vydavać toje, što ličyć patrebnym i važnym. Kazaŭ toje, što dumaŭ, nie bajaŭsia dzialicca svaimi dumkami z navakolnymi.

U naš čas hetaha dastatkova, kab być vinavatym.

Ja viedaju, što zaraz źjavicca vielmi šmat hramadzian, jakija śpiecyjalna ci pa dušeŭnaj naiŭnaści buduć razvažać, maŭlaŭ, «artykuł ekanamičny», dziejničać «treba aściarožniej» i «razumniej», i takim voś čynam płaŭna padviaduć łahičny šerah da sakramientalnaje «sam vinavaty».

Biada tolki ŭ tym, što, jak praviła, hetyja razumnyja i pradumanyja hramadzianie nie vydavali knih i nie raspaŭsiudžvali ich va ŭmovach łukašenkaŭskaj rečaisnaści. A kali chtości i zdolny na takija cudy, to, viedajučy dzikija ŭmovy, u jakija pastaŭlena ŭ RB vydavieckaja dziejnaść, asudžać Bułhakava i Arche jon nie budzie.

Sumna nazirać, jak čarhovy kruty i samabytny prajekt utoptvajecca ŭ brud i ŭsimi siłami vyšturchvajecca za miežy Respubliki Biełaruś.

Aptymizmu ŭ hetuju historyju dadaje tolki nastupny fakt.

Siońnia stała viadoma, što aŭtarytetny amierykanski časopis Newsweek spyniaje isnavańnie ŭ drukavanym vyhladzie. Apošni numar vyjdzie ŭ śviet 31 śniežnia 2012 hoda. Pryčyny hetaha, viadoma ž, absalutna inšyja, čym u vypadku z Arche. Newsweek dobraachvotna pierachodzić u šerah internet-ŚMI. Jaho kiraŭnictva ličyć, što drukavanyja vydańni asudžanyja na vymirańnie i kancentruje svaje siły na raźvićci internet-viersii.

Siońnia ŭ Biełarusi mienavita internet źjaŭlajecca alternatyvaj začyščanaj da kazarmavaj šeraści biełaruskaj miedyja-rečaisnaści.

Tam jość miesca i dla Arche.

Redakcyi časopisa zastałosia tolki ŭličyć asablivaści sieciva, uziać na ŭzbrajeńnie ŭsie navamodnyja i prasunutyja internietaŭskija know-how i raźvić Arche.by u paŭnavartasnuju kulturna-fiłasofskuju placoŭku, a paźniej, cynična vykarystoŭvajučy skandał źviazany z vajnoj uładaŭ suprać realnaha Arche, «raskrucić» jaje.

Zadača składanaja, ale absalutna realnaja. I, jak mnie zdajecca, heta adzinaja mahčymaść vyratavać Arche.

• 0
• 0
• 0
• 0
• 0
• 0
• 0
• 0