Paśla 10 dzion turmy Siŭčyk vyjšaŭ na volu
Paśla dziesiacidzionnaj «adsidki» ŭ specpryjomniku-raźmierkavalniku na vuł. Akreścina ŭ Miensku viarnuŭsia namieśnik staršyni BNF Viačasłaŭ Siŭčyk.
Sp. Siŭčyk byŭ zatrymany kryminalnym vyšukam 28 sakavika niedaloka ad pamiaškańnia ŭpravy Sojmu BNF. Zatrymańnie adbyłosia ŭ 14.45, paśla čaho Siŭčyka advieźli ŭ Saviecki RAUS Miensku i tolki praz 28 hadzinaŭ pieravieźli ŭ budynak Savieckaha rajsudu. Tam vynieśli prysud: 10 sutak źniavoleńnia za «arhanizacyju niesankcyjavanaha šeścia» 25 sakavika, u Dzień Voli.
Za hetyja 10 sutak Viačasłaŭ Siŭčyk paśpieŭ źmianić ažno 5 kameraŭ. Jak śviedčyć sam sp. Siŭčyk, tam byli i ludzi z adkrytaj formaj suchotaŭ. Čaćviora sutak namieśnik staršyni BNF prasiedzieŭ u kamery, dzie była vybitaja šyba (na vulicy było choładna i jšoŭ śnieh). U apošniuju noč Siŭčyka kinuli ŭ kameru, dzie, jak užo było viadoma, ranicaj musili pravieści dezinsekcyju. U 12 hadzinaŭ nastupnaha dnia (7 krasavika) jaje pradezinsektavali — atrutu raźlili na padłohu, nary, ścieny, pryčym zatrymanych z kamery nia vyvieli (tolki adnojčy pieraviali na 30 chvilinaŭ u inšuju kameru, dzie było nieatručanaje pavietra). Siŭčyka trymali ŭ «pradezinsektavanaj» kamery da samaha vyzvaleńnia, 5-ci hadzinaŭ ranicy 8 krasavika.
«Ja pierakanany, što ŭsio heta rabiłasia śviadoma, — kaža Viačasłaŭ Siŭčyk, — režym imkniecca ŭsialak prynizić i zapałochać ludziej. Ale praz heta vidno, nakolki mocna sama ŭłada znachodzicca ŭ strachu».
Ranicaj 8 krasavika na vychadzie sa specpryjomniku Siŭčyka sustrakała piać mašynaŭ ź siabrami j adnadumcami — heta mocna ŭraziła persanał «Akreścina».
Presavaja słužba BNF «Adradžeńnie» i Partyi BNF
Kamientary