Čačenija
Prapała linija frontu
U subotu ŭ štabie Abjadnanaje hrupoŭki rasiejskich vojskaŭ na Paŭnočnym Kaŭkazie paviedamili sensacyjnuju navinu: u "vyzvalenym" Hroznym – paŭtysiačy čačenskich partyzanaŭ, jakija vydatna ŭzbrojenyja.
Pavodle źviestak z taho ž štabu, sytuacyja ŭ Čačenii znoŭ abvastrajecca. Tolki za adzin dzień 3 červienia čačency zrabili 28 atak na rasiejskija vojski. Pavodle rasiejskich vajskoŭcaŭ, było zabita 168 čačencaŭ. Ale ŭvaha! Jany byli zabityja pry sprobie praryvu z Dahiestanu! Vyśviatlajecca, što tam taksama kala paŭtysiačy partyzanaŭ – "nia mienš pradumana ŭzbrojenych".
U toj samy dzień u Inhušecii, u Samaškinskim lesie, iznoŭ była abstralanaja aŭtakalona rasiejcaŭ. Partyzanaŭ hetym razam nie znajšli. Navat kali zrabić karekcyju na rasiejskuju prapahandu, davodzicca kanstatavać, što vajna, jak rakavaja puchlina, tolki raspaŭzajecca pa Kaŭkazie. Kali padličyć kolkaść nibyta zabitych paŭstancaŭ, dadać da ich pałonnych, dyk usio adno atrymlivajecca, što jašče bolš za dźvie traciny čačenskaha vojska acaleła razam sa svaim hałoŭnym kamandavańniem. Ich niama ŭ šmatkroć pračasanych i "začyščanych"rasiejcami nasielenych punktach. Dzie ž jano, čačenskaje vojska? Ciapier – za śpinaju ŭ akupantaŭ. Linija frontu prapała. I śmierć moža čakać rasiejcaŭ dy ich pamahatych paŭsiul. Zamach na mera Hroznaha j hibiel namieśnika pradstaŭnika rasiejskaha ŭradu Źvierava i pamočnicy hroźnienskaha mera tamu paćvierdžańniem. I heta nie ŭ lasoch ci horach, a ŭ samym centry "vyzvalenaj" stalicy Ičkieryi!
Nahadaju, što načalnik rasiejskaha Hienštabu Kvašnin 2 červienia zajaviŭ, što vajskovaja aperacyja suprać čačencaŭ zakončanaja. U toj ža dzień čačenskija bajcy padbili rasiejski hielikopter Mi-8.
Kali Kvašnin ahučyŭ palityčny kurs ciapierašniaha kiraŭnictva Rasiei, dyk heta moža aznačać, što nieŭzabavie pačnucca mirnyja pieramovy, na jakich ad pačatku nastojvaŭ prezydent Ičkieryi hienerał Asłan Maschadaŭ. Heta ŭskosna paćvierdziŭ i rasiejski premjer Kaśjanaŭ, jaki dniami zajaviŭ, što mienavita palityčnaje ŭrehulavańnie jość ciapier dla rasiejcaŭ "absalutna pryjarytetnym", i kiraŭnictva Rasiei ŭžo vypracoŭvaje plan maštabnaha ŭrehulavańnia kryzysu ŭ rehijonie. Kali nie, i słovy rasiejskaha štabista – zvyčajnaje vychvaleńnie, a słovy premjera chłuśnia, tady vajna budzie zabirać usio novyja j novyja achviary, a terytoryja vajny biaz frontu raściahniecca ad Kaśpija da Čornaha mora.
Hary Kumaniecki
Kamientary