№ 19 (228), 7 traŭnia 2001 h.
Amerykanski dyplamat havaryŭ pa-biełarusku
Apošniaja muzyčnaja impreza cyklu «Try sustrečy» Ryhora Baradulina j Alesia Kamockaha adbyłasia ŭ mienskim Čyrvonym kaściole 3 traŭnia. Sensacyjaj imprezy stała pryvitańnie Džona Kunstatera, pieršaha sakratara ambasady ZŠA, na dobraj biełaruskaj movie.
Dž.Kunstater havaryŭ ščyra. Heta ŭzrušyła zalu, što kolki razoŭ poŭniłasia doŭhimi hučnymi vopleskami. Dž.Kunstater skazaŭ: «Šanoŭnaje spadarstva! (Vopleski) Ja zamiežny čałaviek, ja hanarusia tym, što naviedaŭ hety kancert blikučych zorak biełaruskaje, a tamu j eŭrapiejskaje kultury». (Vopleski)
R.Baradulin padziakavaŭ Dž.Kunstateru: «Choć našaja kałchoznaja prapahanda havoryć, što Ameryka na nas drenny ŭpłyŭ maje, dyk ja dumaju, što našym kiraŭnikam tre było b pavučycca movy ŭ pradstaŭnika vialikich Złučanych Štataŭ Ameryki».
Apošniaja sustreča muzyčna-paetyčnaha cyklu duetu R.Baradulina j A.Kamockaha adbyłasia z udziełam kurdzkaha paeta Hanada Čarkaziana, zaniesienaha dolaju ŭ Biełaruś. Jak viadoma, ciapier u Kurdystanie vajna. Kurdy zmahajucca za niezaležnaść i stvareńnie svaje dziaržavy na ziemlach, razarvanych miž Tureččynaju, Iranam dy Irakam. Mova j niezaležnaść dla kurdaŭ nia mienš aktualnyja, čymsia dla nas. Za časoŭ SSSR u Armienii kurdzkaju movaju vychodziła hazeta, u jakoj časta źmiaščaŭ svaje vieršy H.Čarkazian. Ciapier jon piša rodnaju movaju «ŭ stoł». Kurdystan — radzima Zaratustry. H.Čarkazian zaŭsiody byŭ addany viery prodkaŭ: jak i niekatoryja kurdy, jon vohniepakłońnik, ale šanuje j biełaruskija tradycyi. Pierakładzienaja R.Baradulinym u biełaruskuju, paezija j proza H.Čarkaziana časta vydajecca ŭ mienskich vydaviectvach. Čaściej navat za tvory pierakładnika.
«Try sustrečy» R.Baradulina j A.Kamockaha daduć plon u vyhladzie novych kampakt-dyskaŭ i muzyčnych albomaŭ, a staryja buduć dapoŭnienyja novymi tvorami. Albomy «Psalmy», «Asianina», «Zorka spahady», «Balady» j «Hojknuŭ baravik» možna prydbać u raspaŭsiudnikaŭ na mienskich siadzibach BNF i TBM.
Viktar Muchin
Kamientary