Zatrymanaja Natalla Šaŭko
Niamieckija pamiežniki zatrymali pry pierasiačeńni miažy FRH hramadzianku Biełarusi Natallu Sudlankovu (Šaŭko) — byłuju ŭładalnicu kampanii “Fiko”.
Natalla Šaŭko — vypusknica chimfaku BDU, paśla zakančeńnia jakoha pracavała na zavodzie “Ŭdarnik”. Zornym časam dla Šaŭko byŭ pačatak 1990-ch hadoŭ, kali jana pajšła ŭ biznes. Finansava-investycyjnaja kampanija “Fiko” paśpiachova raźvivałasia, a imia jejnaj prezydentki Natalli Šaŭko stałasia viadomym. Interviju ź joj u toj čas źmiaščali mnohija pravyja hazety, jakim impanavała padtrymka joju demakratyčnych partyj.
Šaŭko jašče ŭ kancy 1980-ch brała ŭdzieł u dziejnaści lehiendarnaj arhanizacyi “Tałaka”, paśla była prychilnicaj BNF. Znachodziačysia na pasadzie prezydenta bujnoj firmy, Natalla Šaŭko dapamahała nacyjanalnamu ruchu finansava.
Paśla prychodu da ŭłady Alaksandra Łukašenki firma “Fiko” trapiła pad kryminalnuju spravu. U vyniku hetaha ŭ 1999 hodzie Natalla Šaŭko razam ź siamjoj vyjechała za miažu, atrymała palityčny prytułak u Čechii, dzie i žyła apošnija try hady. Zatrymanaja jana była padčas pierasiačeńnia česka-niamieckaj miažy. Akazałasia, biełaruskija ŭłady šukali jaje praź Interpoł i damahalisia vydačy ŭ Biełaruś.
Dyrektar Biełaruskaj słužby radyjo “Svaboda” Alaksandar Łukašuk zajaviŭ u etery, što ličyć aryšt N.Sudlankovaj palityčna matyvavanym. Na jahonuju dumku, ułady Biełarusi imknucca pakarać jaje i za minułuju dziejnaść, i za siońniašniuju — apošnim časam Natalla rabiła repartažy dla radyjo “Svaboda”.
Ciapier los Sudlankovaj vyrašyć niamiecki sud. U jaje abaronu ŭžo vystupili pravaabarončyja arhanizacyi i českija ŭłady.
Aleh Tačony
Kamientary