Sioleta Biełaruski licej nabraŭ tolki adnu hrupu pieršakurśnikaŭ. Achvotu pačać navučańnie na pieršym kursie vykazali 9 čałaviek. Jašče 5 navučencaŭ dadalisia na inšyja kursy. Lavon Barščeŭski ŭ razmovie z karespandentam «NN» byŭ krychu rasčaravany: čakaŭ, što ŭ Miensku bolš azaviecca biełaruskamoŭnych baćkoŭ. Adnak jon nie hublaje aptymizmu i spadziajecca, što da pačatku vieraśnia kolkaść pieršakurśnikaŭ pavialičycca.
Pryčynaj takoj małoj aktyŭnaści Barščeŭski ličyć adsutnaść stałaha pamiaškańnia: baćkam strašnavata adpuskać dziaciej 8—9-ch klasaŭ «boŭtacca» z kvatery na kvateru. 10—11-klaśnikam baćki daviarajuć bolej. Mahčyma, u budučyni Licej piarojdzie na nabor tolki dźviuch staršych paralelaŭ.
Sioletnija pretendenty na zvańnie liceistaŭ zdavali ispyty pa biełaruskaj movie (piśmovy test) i zamiežnaj movie (test i sumoŭje). Ad tradycyjnaha dla Liceju ekzamenu pa historyi Biełarusi vykładčyki vyrašyli admovicca: umovy nie spryjali.
«Chočam vučycca pa-biełarusku»
A ŭ 16.00 1 vieraśnia siabry niezarehistravanych inicyjatyvaŭ Zadzinočańnie biełaruskich studentaŭ, Moładzievaja inicyjatyva «Voka» i Moładź Biełaruskaha liceju zaklikali dziaŭčat i junakoŭ sabracca na Kastryčnickim placy na masavuju akcyju ŭ padtrymku biełaruskaje movy pad lozunham «Chočam vučycca pa-biełarusku». Takija samyja akcyi rychtujucca ŭ Bieraści, Horadni, Viciebsku j Słonimie.
Sioletnija vypuskniki Liceju padtrymlivajuć kantakty z navučalnaj ustanovaj, prychodziać na štotydniovyja licejskija schody ŭ čaćviarhi. Usie jany ciapier studenty — jak biełaruskich VNU, tak i ŭstanoŭ Čechii, Litvy, Polščy, Niamieččyny. Tolki adna dziaŭčyna, jakaja padavała dakumenty ŭ Akademiju mastactvaŭ, nie prajšła pa konkursie.
Pajechać ža za miažu pa licejskaj prahramie jana nia zdoleła, bo svaim časam vyrašyła nie zdavać licejskich ispytaŭ.
Licejskija schody kala staroha budynku adnavilisia z pačatku žniŭnia. Prychodziać nastaŭniki (anichto ź ich nie syšoŭ), baćki, vučni. Znajomiacca z novieńkimi, raspaviadajuć, jak chto baviŭ leta: u lipieni blizu 30 liceistaŭ byli ŭ letniku na voziery Śvir.
19 žniŭnia ŭpieršyniu na licejski schod zavitali milicyjanty. Niekatoryja byli nia ŭ formie, ale ŭsio ž znajomyja tvary — usio minułaje leta prabavili pobač. Nie abyšłosia i biaz zdymak na videakameru. Z mašyny, dzie siadzieli milicyjanty, źjavilisia j niejkija try ambały. Pasiadzieli na łavačcy, panazirali za licejskim schodam, ale blizka nie padychodzili. Tych, chto ŭžo stajaŭ u pikietach, milicyja nie spałochała.
Navički nie adčuvajuć siabie razhublenymi ŭ novaj abstanoŭcy, z małaznajomymi ludźmi. Dla liceistaŭ siońnia ŭsio prosta: usie, chto z nami, — svaje. Tamu sychodziacca vielmi chutka. Maryja pastupiła na 3-i kurs, joj daviadziecca štodnia jeździć u Miensk na elektryčcy z rajonu. Baćkoŭ vybar dački nie pałochaje j nie spyniaje. «Dzieci ŭ nas samastojnyja. Syn — aktyvist AHP. My ŭśviedamlajem, na što idziom», — kaža maci.
Antoś pastupiŭ na 4-y kurs. Dla Liceju takija navučency — vyniatak, bo ciažka vučyć apošni hod čałavieka, jaki dahetul navučaŭsia pa zusim inšych prahramach. Raniej vučyŭsia ŭ himnazii na Paŭdniovym Zachadzie. Himnazija była śpiarša biełaruskaj, ale hadoŭ šeść tamu stała rasiejskaj. Kaža, što pra Licej viedaŭ ad siabroŭ, jakija jaho skončyli j jakija navučajucca siońnia. Vyrašyŭ pajści ŭ Licej, bo jamu spadabałasia atmasfera, jakaja tut panuje. Baćki śpiarša byli suprać, ale chutka dali siabie ŭhavaryć.
1 vieraśnia a 10-j hadzinie liceisty tradycyjna pryjduć na Dzień viedaŭ da svajho budynku pa vuł.Kirava, 21.
Arkadź Šanski
Svajak Viktara Łukašenki zajmaje vysokija pasady ŭ KDB. Heta vyśvietliłasia, kali zabrali budynak dziciačaj palikliniki7
Kamientary