Rublavańnie praciahvajecca
Biełaruś dy Rasieja znoŭ damovilisia pra ŭviadzieńnie adzinaj valuty. Hetym razam rasiejski rubiel źbirajucca ŭvodzić z 1 studzienia 2006 hodu. Rada ministraŭ SBiR pryniała plan dziejańniaŭ pa ŭviadzieńni adzinych hrošaj. Praŭda, pra adziny emisijny centar zhody jak nie było, tak i niama.
PDV: trajny varyjant
Urad padrychtavaŭ na podpis Łukašenku try varyjanty rašeńnia pytańnia pra PDV, jaki pavinny płacić indyvidualnyja pradprymalniki. Pavodle pieršaha, PDV možna budzie płacić pa sproščanaj schiemie. Zhodna z druhim varyjantam, płacić PDV možna budzie pa zajaŭnym pryncypie — praktyčna bieź nijakich dakumentaŭ. Treci varyjant praduhledžvaje admienu PDV dla pradprymalnikaŭ, ale ŭ takim vypadku padymuć staŭku adzinaha padatku.
Kazachstan hladzić na «Naftan»
Urad Kazachstanu prapanuje Biełarusi dapamohu ŭ rekanstrukcyi «Naftanu». Robić jon heta z raźlikam raspačać pastaŭki nafty ŭ našu krainu dla pierapracoŭki na madernizavanym zavodzie. Planujecca, što Kazachstan budzie ekspartavać u Biełaruś kala 2 młn tonaŭ nafty štohod — pa suśvietnych cenach.
Bryljanty paciakuć rakoj
Karparacyja «De Birz», suśvietna viadomy vytvorca bryljantaŭ, adšukała sabie partnera ŭ Biełarusi. Im budzie homielskaje pradpryjemstva «Kryštal». Z traŭnia 2004 h. «Kryštal» spyniŭ ahranku ałmazaŭ praz toje, što pastaŭščyk — rasiejskaja kampanija «Ałrosa» — pavysiŭ ceny. Pakul što pastaŭki ałmazaŭ — sprava niejmavierna zabiurakratyzavanaja, ale ŭrad planuje jaje liberalizacyju.
Ahulnaja štrychkadyzacyja
Urad razhladaje prajekt pastanovy pra abaviazkovaje štrychavoje kadziravańnie tavaraŭ. Chutčej za ŭsio, užo ŭ sakaviku ŭsie tavary,
što pradajucca ŭ kramach, u tym liku impartnyja, treba budzie paznačać štrych-kodam. Uradavy Fond infarmatyzacyi miarkuje, što heta budzie važnym krokam i dla raźviććja elektronnaha handlu.
«Lido» razbudujecca
Łatvijskaja kampanija «Lido» źbirajecca pabudavać u Miensku jašče adzin restaran, na praspekcie Mašerava. Heta budzie ceły kompleks — restaran z łatyskimi stravami, hatel, park atrakcyjonaŭ dy ihralnych aŭtamataŭ. Svoj pieršy i pakul adziny restaran «Lido» pabudavała ŭ Miensku (nasuprać CUMu) letaś. $1,5 młn, što pajšli na budoŭlu, planujuć akupić za try hady.
AK, AFN
Kamientary