Rajs sustreniecca ź biełaruskimi liderami
21 krasavika ŭ Vilni miełasia adbycca sustreča lideraŭ demakratyčnaha ruchu Biełarusi ź dziaržsakratarom ZŠA Kandalizaj Rajs. Pavodle lidera AHP Anatola Labiedźki na sustreču ŭ Vilni nakiravalisia siem pradstaŭnikoŭ palityčnych partyj i niedziaržaŭnych arhanizacyj. Imiony vizytantaŭ, dziela kanśpiracyi, nie nazyvalisia.
Sprava Čarkasavaj
20 krasavika spoŭniłasia paŭhodu, jak zabili žurnalistku hazety «Salidarnaść» Vieraniku Čarkasavu. «Śledztva nia zrušyłasia ź miortvaj kropki», — zajaviła na pres-kanferencyi 19 krasavika ŭ ofisie BAŽ maci žurnalistki. Pavodle słoŭ Dyjany Čarkasavaj, na niadaŭniaj hutarcy ŭ prakuratury joj zadavalisia tyja ž pytańni, što i paŭhodu tamu. Nie źmianiłasia i aficyjnaja versija — zabojstva na pabytovaj hlebie, a siarod padazravanych pa-raniejšamu syn Vieraniki Anton Filimonaŭ i jejny ajčym Uładzimier Mialeška. Miž tym svajaki padazrajuć, što zabojstva žurnalistki źviazana ź jejnaj prafesijnaj dziejnaściu. «Biełorusskaja diełovaja hazieta» pisała, što Čarkasava rychtavała materyjał pra kantakty ŭładaŭ z režymam Sadama Chusejna ŭ Iraku.
Kataliki zmahajucca za Śviatoha Jazepa
Kataliki patrabujuć ad uładaŭ viarnuć staličny kaścioł Śv. Jazepa i klaštar bernardyncaŭ. U kaściole siońnia — Biełaruski dziaržaŭny archiŭ-muzej litaratury j mastactva. Budynak klaštaru zajmaje vajskovaja kamendatura. Parafijanie pačali nabaženstvy prosta na prystupkach i majuć słužyć ich štodzionna.
Pieramoha aŭtaraŭ «NN»
Fotakarespandent «Našaj Nivy» Julija Daraškievič stała pieramožcam I Konkursu ličbavaj fatahrafii «Drajv», arhanizavanym tvorčym sajuzam «Fotamastactva». U konkursie brali ŭdzieł 86 mastakoŭ. Siarod pieramožcaŭ taksama — daŭni aŭtar «NN» vilančuk Dzianis Ramaniuk. Cyrymonija ŭznaharodžańnia projdzie ŭ piatnicu, 22 krasavika, u kanhres-zali hatelu «Biełaruś» (pačatak a 14-j).
Hros padaŭ u adstaŭku
Samy małady premjer-ministar Eŭropy, lider českich sacyjał-demakrataŭ Stanisłaŭ Hros padaŭ u adstaŭku. Dźvie pravyja partyi — «chadeki» i Sajuz svabody — pahadzilisia ŭvajści ŭ kiroŭnuju kaalicyju i sfarmavać urad pry ŭmovie adstaŭki 35-hadovaha Hrosa. Kolki tydniaŭ tamu ŭ Čechii vybuchnuŭ palityčny kryzys: siamja Hrosa akazałasia datyčnaj da karupcyjnaha skandału. Novy kabinet uznačalić ministar rehijanalnaha raźvićcia Iržy Paroŭbiek.
Rasiejcy praryvajuć izalacyju
U sieradu Miensk z adnadzionnym vizytam naviedali ministar abarony Rasiei Siarhiej Ivanoŭ i načalnik Hienštabu Uzbrojenych siłaŭ Jury Bałujeŭski. Hałoŭnaj temaj sustrečy z A.Łukašenkam było pytańnie stvareńnia adzinaj systemy biaśpieki sajuznaj dziaržavy. Na dumku niezaležnaha vajskovaha ahladalnika Alaksandra Alesina, Rasieja choča zrabić ź Biełarusi «suchaputny avijanosiec».
AH; afn.by, svaboda.org
Kamientary