«Apriel» . (s) «J_Mopc», 2005. (p) «J_Mopc», 2005. «Vest Rekards-plus»
Albom hurtu «J_Mopc» «Apriel» možna vydavać z padzahałoŭkam: «Kachańnie j šoŭ-biznes u epochu infarmacyjna-kamputarnaj cyvilizacyi».
U tekstach piesień pryhadvajucca mabilniki i MMS, pravajdery i linki, pradusary i vokładki modnych časopisaŭ. Heta źbiantežyć nieabaznanaha słuchača, ale vidavočna pryvabić daśviedčanaha.
Paradaksalnaje susiedztva «fłešak dla cinoŭ» i «visłavuchich prynces» u lirycy «J_Mopc» nadaje joj admysłovy šarm. U spałučeńni z charakternym vakałam Uładzimiera Puhača hety šarm padvojvajecca i nie dazvalaje hurtu saśliznuć u bok pašłavataha patasu typovych chłapčukovych kamandaŭ.
Zrešty, całkam uniknuć niebiaśpiečnaha krenu hrupie nie ŭdałosia: pieśniu «Rabota nad ošibkami» paspalitaje vucha ŭraz pierabłytaje z darobkam Valeryja Mieładze.
U paraŭnańni z papiarednim, u novym albomie paboleła biełaruskaj i serbskaj movy. Pa-biełarusku hučać hitovyja kampazycyi «Jana» (ab pańnie serca, što zdatnaja dapamahčy, «navat kali nie kachaje ciabie») i užo viadomaja «Tak-cik-tak». Pa-serbsku havoryć dziaŭčyna va ŭstupie da pieśni «Śniłoś», jakaja apiavaje junuju fanatku, što tolki-tolki zakinuła cacki dy imkniecca dałučycca da śvietu darosłych kaktejlaŭ i zorkavaha śmiećcia.
Paraviny hodu ŭ pieśniach «Apriel», «Miatnoje leto» i «Vmiestie navsiehda» («100 doroh») sutykajucca procilehłaściu nastrojaŭ: viasnovaja biespryčynnaja radaść ad karamelaŭ, bieskłapotnaść letnich basejnaŭ na hatelnych dachach, vosieńskaja zadumiennaść pra niaŭličanyja vyniki ściskańnia suśvietu. Ale toje samaje ściskańnie nie zmahło sapsavać kaver na saviecki kasmanaŭcki hit «Trava la domu».
«J_Mopc» stupiŭ u stadyju miednych trubaŭ. Nastupny albom pavinien budzie zaśviedčyć, nakolki muzyki zmohuć abstrahavacca ad nakatanaj kalainy vytvorčaści hitoŭ i prezentavać niešta śviežaje i aryhinalnaje.
Niaklajeŭ apublikavaŭ złabadzionny vierš. U im zhadvajecca i Kaleśnikava z Babarykam, i Cichanoŭskaja, i Prakopjeŭ z Paźniakom23
Kamientary