Расійскі шавініст заклікае ліквідаваць Украіну і Беларусь, абражае Парашэнку і Лукашэнку
Аляксандр Жучкоўскі, вядомы «данецкі апалчэнец» з расійскім пашпартам і публіцыст, якога друкуюць многія расійскія выданні, распавёў пра сваё стаўленне не толькі да Украіны, але і да беларускай дзяржаўнасці.
«Магчыма, Стралкоў… вымушаны прытрымлівацца «палітэсу» і не можа дазволіць сабе поўную свабоду меркаванняў. Я ж «асоба неафіцыйная, а магчыма і гультайская», таму магу казаць наўпрост, што як расійскі нацыяналіст-імперыяліст, як вялікарос гляджу на БУ (Беларусь і Украіну) як на недарэчнасць, з пагардай», — напісаў Жучкоўскі ў сваім Facebook.
Жучкоўскі — папулярны расійскі блогер і журналіст, артыкулы якога перадрукоўваюцца як анлайн-СМІ шавіністычнай скіраванасці, такімі як «Спутник и погром», гэтак і проста прапуцінскімі apn.ru, rus-obr.ru, vz.ru.
З вясны 2014 года ён быў ва Украіне, ваяваў супраць украінскай арміі і збіраў у РФ матэрыяльную дапамогу для баевікоў.
«Дзяржавамі БУ з незалежнасцю і «мовамі» глыбока пагарджаю… Чаму мы прызнаем межы, якія нарэзалі камуністы, і сур'ёзна кажам пра БУ?», — дадае Жучкоўскі ў тым жа допісе.
«Так, ёсць такія дзяржаўкі, Украіна і Беларусь. Адной кіруе ўкраінец Парашэнка, другой кіруе ўкраінец Лукашэнка. Ходзяць цяпер парай у Мінску, пераміргваюцца і гігікаюць за спінай у Пуціна», — зняважліва піша баявік-прапагандыст (цытуем толькі невялічкую частку выпадаў).
Лукашэнка і Парашэнка, беларускія і ўкраінскія ўрадоўцы нахабна атрымліваюць асалоду ад таго, што быццам бы размаўляюць з Расіяй на роўных, лічыць Жучкоўскі.
«Хто на роўных? Што на роўных? Панскі касцюм нацягнулі і думаюць пра сябе невядома што. Яны павінны ў Мюнхене, Мінску і паўсюль хадзіць і Лаўрову ў вочы заглядваць, адгадваць, што думае і хоча пан», — заключае ён, называючы халопамі тых, хто «дзеліць Расію на РСФСР, УССР і БССР».
У Беларусі «ДНР» і іншых прарасійскіх марыянетак падтрымліваюць такія рэсурсы як «Западная Русь» і imperiya.by. Пры гэтым галоўнага рэдактара «Заходняй Русі» Ігара Зелянкоўскага Вадзім Гігін перыядычна запрашае выступаць на беларускім тэлебачанні.
Каментары