КДБ апублікаваў відэа допытаў палітвязня Шаўрова, дзе той нагаварыў лухты. Праваабаронцы: Гэта ні на што не ўплывае
Турэмнае зняволенне, бясспрэчна, стрэсавая сітуацыя. І гэтаму стрэсу кожны дае рады па-свойму. Адны прынцыпова не супрацоўнічаюць са следствам і адмаўляюцца даваць паказанні. Іншыя робяць наадварот — праз дыялогі са следчымі спрабуюць перайграць сістэму.
24 красавіка КДБ апублікаваў відэа гутарак з палітвязнем Піліпам Шаўровым, які ад студзеня знаходзіцца ў ізалятары за тое, што размаляваў рукі помніку Аляксандру Пушкіну ў чырвоны колер. Правабаронцы лічаць Піліпа Шаўрова палітвязнем. Яны мяркуюць, што ў ягоных дзеяннях няма складу злачынства па ч. 1 і ч. 2 арт. 339 КК («Хуліганства»), а пазбаўленне волі хлопца з'яўляецца палітычна матываваным.
«НН» з этычных прычын не публікуе відэа допытаў. Незразумела, ці была атрыманая згода ад самога Шаўрова на здымкі, а тым больш змяшчэнне гэтых запісаў у інтэрнэт.
Калі коратка, то на гэтых відэа Шаўроў дае не самыя пазітыўныя ацэнкі сваім паплечнікам — Паўлу Севярынцу, Дзянісу Урбановічу, а таксама Віталю Рымашэўскаму, Міколу Статкевічу і іншым апазіцыянерам. Таксама ён саркастычна выказваецца пра тое, што праваабаронцы прызналі яго палітвязнем. Ну і галоўны пасыл гэтай публікацыі наступны: які ён палітвязень, калі сам сябе такім не лічыць.
Кіраўнік Беларускай хрысціянскай дэмакратыі Павел Севярынец, які некалькі разоў згадваецца ў гэтых відэа, так пракаментаваў для «НН» з’яўленне гэтага матэрыяла:
«Гэта няўдалая спроба КДБ пераключыць увагу з каранавіруса і катастрофы, да якой Лукашэнка прывёў Беларусь. Тыповая правакацыя. Магчыма, мантаж. Мы ў любым разе будзем патрабаваць вызвалення Піліпа Шаўрова. Пагаворым з ім пасля вызвалення, што там было насамрэч».
Праваабаронцы не мяняюць сваёй пазіцыі па справе Шаўрова. Адзін з кіраўнікоў «Вясны» Валянцін Стэфановіч сказаў наступнае:
«Калі мы прызнаём кагосьці палітвязнем, то не ацэньваем чалавека з ягоных асабістых ці дзелавых якасцяў. Палітвязень — гэта не ганаровае званне і не пераходзячы вымпел. Мы ацэньваем дзеянні ўладаў, кваліфікацыю таго, што зрабіў Шаўроў.
За шматгадовую праваабарончую дзейнасць даводзілася шмат што бачыць. Шаўроў шмат чаго нагаварыў, але нічога наконт сваёй справы. Ён дае ацэнкі канкрэтным асобам, але гэта проста думкі ўслых, якія не маюць дачынення да справы. Ну нагаварыў — і нагаварыў. Мы не сыходзім з таго, хто хоча быць палітвязнем, а хто не хоча — Эдуард Пальчыс таксама ў свой час не хацеў быць палітвязнем.
Мы сыходзім не з жаданняў людзей, а з дзеянняў улады. Відэа ні на што не ўплывае ў дадзенай справе», — адзначае Стэфановіч.
Каментары