Прафесар Майкл Петэрсан, дырэктар вывучэння марскога патэнцыялу Расіі пры Ваенна-марскім каледжы ЗША, сказаў BBC, што пакуль рана казаць аб тым, наколькі моцная шкода нанесеная крэйсеру «Масква», але падобна, што ўкраінцам удалося здабыць важную перамогу на моры.
«Я думаю, яна мае і сімвалічнае, і ваеннае значэнне, — кажа спецыяліст. — Гэта флагман расійскага Чарнаморскага флоту, ён ужо крыху састарэў, але гэта ўсё яшчэ сімвал расійскай ваеннай моцы на Чорным моры».
Украінцы страцілі свой флот у 2014 годзе пасля анэксіі Крыма, таму, лічыць Петэрсан, сам факт таго, што ўкраінцы могуць наносіць такія ўдары, надзвычай сімвалічны і балючы для расійскага кіраўніцтва. Цяпер расійскі флот можа адчуць неабходнасць дзейнічаць на большым аддаленні ад украінскага берага.
«Гэта можа паўплываць на магчымасці прамой агнявой падтрымкі войскаў і супрацьпаветранай абароны прыбярэжных раёнаў. Я лічу, што гэта прымусіць расійскіх маракоў двойчы падумаць», — заключае Майкл Пэтэрсан.
Каментары