Кіраўнік МЗС Латвіі патрабуе тлумачэнняў з-за візіту латвійскіх дзяцей на «Славянскі базар»
Кіраўнік МЗС Латвіі Эдгар Рынкевічс патрабуе тлумачэння адпаведных устаноў праз арганізацыю візіту выхаванцаў рыжскай дзіцячай арганізацыі на фестываль «Славянскі базар», піша Delfi.
Выхаванцы і прадстаўнікі Рыжскай дзіцячай акадэміі радыё і тэлебачання Academy KidsTV здзейснілі паездку ў Віцебск для ўдзелу ў міжнародным фестывалі «Славянскі базар».
Academy KidsTV раней звярталася да Лукашэнкі з просьбай аб магчымасці ўзяць у яго інтэрв'ю.
Дзіцячая арганізацыя перакананая, што «ў цяперашняй сітуацыі ў свеце гэта [інтэрв'ю] станоўча адаб'ецца на адносінах».
Служба дзяржаўнай бяспекі Латвіі (СДБ) паведаміла, што ўстанова ў рамках сваёй кампетэнцыі сочыць за дзейнасцю розных арганізацый у Латвіі, ацэньваючы, ці няма ў іх дзейнасці магчымых пагроз нацыянальнай бяспецы. Улічваючы спецыфіку дзейнасці службаў, СДБ устрымліваецца ад каментарыяў па канкрэтных выпадках.
У сваю чаргу, МЗС папросіць адказныя ўстановы ацаніць паездку Рыжскай дзіцячай акадэміі радыё і тэлебачання Academy KidsTV на фестываль у Беларусь, паведаміў у Twitter міністр замежных спраў Эдгар Рынкевічс.
Паводле яго слоў, плануецца звязацца з адказнымі ўстановамі з просьбай даць ацэнку дзеянням Academy KidsTV.
«З-за грубага ігнаравання рэкамендацый МЗС па бяспецы падарожжаў і ўдзелу ў інфармацыйнай вайне дзейнасць падобных арганізацый недапушчальная і павінна быць спыненая», — лічыць міністр.
Каментары