Беларускія банкі таксама будуць даставаць чыпы з нявыкарыстаных картак
Беларускі «Сбер Банк» вырашыў прымяніць у Беларусі вопыт Расіі. З картак, якія былі выпушчаныя, але аказаліся незапатрабаваныя кліентамі, цяпер будуць даставаць чыпы, выдаляць з іх персанальную інфармацыю і ўстаўляць у новы «пластык», паведамляе Office Life.
Як расказаў старшыня праўлення «Сбер Банка» Ігар Мяркулаў, такіх загатовак з чыпамі ў банка як мінімум 200 тысяч.
У «Сбер Банку» чыпы са старых картак збіраюцца ўкараняць у новыя карты аплатнай сістэмы «БЕЛКАРТ/МИР».
Раней расійскі «СБЕР» паведаміў, што мае намер даставаць чыпы з нявыкарыстаных картак, каб вырашыць праблему з дэфіцытам камплектуючых для іх.
Пры гэтым з-за санкцый і праблем з пастаўкамі беларускія банкі таксама сутыкнуліся з дэфіцытам загатовак для выпуску новых карт і актыўна працягваюць тэрмін дзеяння ўжо выпушчаных.
Каментары