У ЗША дамовіліся павялічыць столь дзяржаўнага доўгу, каб пазбегнуць дэфолту
Прэзідэнт ЗША Джо Байдэн і спікер Палаты прадстаўнікоў Кангрэса ЗША Кевін Макарці дасягнулі папярэдняй дамоўленасці аб павышэнні столі дзяржаўнага доўгу. Гэта дазволіць краіне пазбегнуць дэфолту, піша Reuters.
Журналісты пішуць, што пагадненне дазволіць ЗША яшчэ больш павялічыць дзяржаўную запазычанасць, якая ўжо перавысіла 31,4 трлн даляраў.
«Некаторы час таму я размаўляў па тэлефоне з прэзідэнтам. Пасля таго, як ён губляў час і месяцамі адмаўляўся весці перамовы, мы прыйшлі да прынцыповага пагаднення, годнага амерыканскага народа», — напісаў Макарці па выніках перамоў у твітары.
У Reuters пагадненне, праўда, апісваецца як «далёкае ад ідэальнага», яно мусіць прайсці цяжкі шлях да канчатковага рашэння ў Кангрэсе ЗША. Пагадненне мае павысіць ліміт доўгу на два гады.
Байдэн, у сваю чаргу, заявіў, што кампрамісны законапраект аб дзяржаўнай запазычанасці спыніць наступленне «катастрафічнага дэфолту». Ён назваў гэта «пагадненнем, якое азначае, што не ўсе атрымліваюць тое, што хочуць».
Раней Мінфін ЗША папярэджваў, што без павышэння столі дзяржаўнага доўгу ЗША грошы ў краіны для аплаты сваіх рахункаў скончацца 5 чэрвеня, і гэта стане велізарным узрушэннем не толькі для саміх Злучаных Штатаў, але і для ўсёй сусветнай эканомікі.
Цяпер чытаюць
Лукашэнка пра «вялікую здзелку» з ЗША: Гэта не толькі палітвязні7
Каментары