Калі другога полюсу няма, яго трэба стварыць.
Адзін полюс добра, паўтара лепш. Выступ «нашага» на саміце ААН нарабіў шухеру. Тыраду «Спадзяюся, гэта зразумеюць і моцныя гэтага сьвету» шмат хто ўспрыняў як рэмэйк фразы «Мы вас пахаваем» і чачоткі, якую Хрушчоў «збацаў» зьнятым з нагі красоўкам на трыбуне ААН.
Мяне ў «Адкрытым поглядзе на сучасны сьвет» (так «Саўбелка» назвала выступ свайго працадаўца) зацікавіў фрагмэнт пра перавагу двухпалярнага сьвету над аднапалярным. Па лёгіцы Менску, каб вярнуць сусьветную стабільнасьць, трэба адрадзіць на плянэце другі геапалітычны полюс. Раней тут халтурыла Масква. Аднак савок, а за ім і ўвесь другі полюс скапыціліся. Калі гэтае аднапалярнае бязьмежжа так і пакінуць, чалавецтва чакаюць жудасныя вынікі: усіх дзяцей і жанчын загоняць у рабства, а астатніх дастануць тэрарысты.
Было б вельмі прыкольна, калі б ААН пагадзілася зь беларускім лідэрам, прызнала неабходнасьць альтэрнатыўнага ЗША полюсу і вынесла на разгляд сэсіі адпаведны праект: «У мэтах дасягненьня сусьветнай гармоніі стварыць альтэрнатыўны ЗША геапалітычны полюс у выглядзе краіны Х, выдаць ёй атамную бомбу і іншыя прычындалы геапалітычнага полюсу. Палове краін сьвету стаць сатэлітамі краіны Х у фармаце блёку, які можна назваць «Блёк другіх палярнікаў». Хто «за»? Аднагалосна.
Застаецца чыста тэхнічнае пытаньне: знайсьці гэты самы другі полюс. Але як і па якіх крытэрах? Прысваеньне, напрыклад, Кітаю ганаровага тытулу «другі полюс» было б несправядлівым у дачыненьні да Індыі і наадварот. Па справядлівасьці было б абвясьціць сярод краін глябальны конкурс на тытул «краіны — другога полюсу». Гэта было б супэр-шоў!
Аднак баюся, што карумпаванасьць ААН зноў дасьць аб сабе знаць. Кофі Анан не ўтрымаецца, возьме на лапу і ў фінальным пуле паставіць за выкананьне нацыянальных танцаў Пуціну 2,1 бала, а нейкаму Мбэку з багатай на алмазы ПАР — 9,9.
Таму геапалітычным Амундсэнам трэба ісьці іншым румбам, кіруючыся здаровымі лягічнымі сылягізмамі. Відавочна, што полюс, альтэрнатыўны ЗША, павінен ляжаць па той бок амэрыканскіх каштоўнасьцяў, эканамічнага ладу і палітычных нормаў. Сапраўды, не прызначаць жа на ролю другога полюсу Канаду, хай сабе тая па вайсковым патэнцыяле, можа, амаль і не саступае ЗША. Карысьці ад такога «полюсу», як ад саюзу Беларусі і Расеі. Трэба татальны антыпод ЗША. Знайсьці яго няцяжка: паглядзець, якая краіна ў індэксе чалавечага разьвіцьця займае тое самае месца, што і ЗША, аднак з адваротнага канца сьпісу. Глядзім — Гандурас.
Вось вакол каго мусяць яднацца ўсе прагрэсіўныя гома сапіенсы. Тэгусыгальпа (сталіца Гандурасу) — трэці полюс, а чацьвёртаму не бываць!
