Біскуп Віцебскі Уладзіслаў Блін сышоў у адстаўку, яго часова замяніў Кісель
25 лютага Папа Бенедыкт XVI прыняў прашэнне біскупа Уладзіслава Бліна [г.н. 1954] аб адстаўцы з кіравання Віцебскай дыяцэзіяй у Беларусі. Адначасова Папа прызначыў Апостальскім адміністратарам sede vacante et ad nutum Sanctae Sedis Віцебскай дыяцэзіі ксяндза прэлата Францішка Кіселя, да гэтага Генеральнага вікарыя той жа дыяцэзіі.
Кс. Францішак Кісель нарадзіўся 1 красавіка 1959 г. на Глыбочынне. Пасля заканчэння школы і вучобы ў Віцебскім тэхнікуме сувязі служыў у войску. У 1982 г. паступіў у Вышэйшую духоўную семінарыю ў Рызе, пасля заканчэння якой атрымаў святарскае пасвячэнне ў 1987 г. У якасці святара пачаў сваё служэнне ў латвійскім марыйным санктуарыі ў Аглоне, а потым працаваў ў Браславе. Восенню 1992 г. быў пераведзены ў Полацк, дзе служыць ужо на працягу больш чым 20 гадоў. За гэты час, дзякуючы яго намаганням, у горадзе быў пабудаваны касцёл св. Андрэя Баболі – сімвал адраджэння каталіцтва на Полаччыне. Акрамя таго, у суседнім Новаполацку, ён заснаваў парафію Найсвяцейшага Сэрца Езуса. Ад стварэння Віцебскай дыяцэзіі ў 1999 г. кс. Кісель з’яўляўся яе Генеральным вікарыем.
Біскуп Уладзіслаў Блін быў прызначаны біскупам Віцебскай дыяцэзіі 13 кастрычніка 1999 г. дэкрэтам папы Яна Паўла ІІ. Біскупскую сакру атрымаў 20 лістапада 1999 г. з рук кардынала Казіміра Свёнтка.
14 чэрвеня 2006 г. абраны намеснікам старшыні Канферэнцыі каталіцкіх біскупаў у Беларусі. З’яўляўся старшынёй Экуменічнай камісіі, а таксама Камісіі агульнага душпастырства епіскапату Беларусі.
Цяпер чытаюць
З'явілася яшчэ адно ФОТА Міколы Статкевіча пасля вызвалення1
Каментары