Прэзідэнт Кыргызстана заявіў, што ў краіне немагчымая стабільнасць з абыякавым стаўленнем некаторых грамадзян да дзяржаўнай мовы. Алмазбек Атамбаеў адзначыў, што незалежна ад нацыянальнасці грамадзяне павінны валодаць кыргызскай мовай.
Аснова шматнацыянальнага Кыргызстана — кыргызы. Падабаецца гэта ці не, валодаць дзяржаўнай мовай неабходна. Вядома, мы павінны стварыць умовы. Толькі захацелі ўвесці дакументаабарот на кыргызскай мове ў адным сяле ў Нарынскай вобласці, як у газетах пачалі пісаць усякае. Некаторыя жыхары Кыргызстана, палітыкі, не саромеючыся ўздымаюць шум, звяртаючыся ў Расію і яе амбасаду ... Гэта ганебна», — сказаў прэзідэнт.
Гэтае выказванне прагучала ў часе пасяджэння Рады абароны Кыргызстана, дзе абмяркоўвалася канцэпцыя ўмацавання міжэтнічных дачыненняў.
На мінулым тыдні парламент краіны ў другім чытанні ўхваліў папраўкі ў закон «Аб дзяржаўнай мове». З-за гэтага парламент пачалі крытыкаваць этнічныя расійцы і расійскамоўныя прадстаўнікі іншых нацыянальнасцяў.
Згодна з папраўкамі, дзяржаўныя службоўцы будуць павінны здаваць іспыт на веданне дзяржаўнай мовы, а афіцыйныя сустрэчы павінны будуць праводзіцца на кыргызскай мове.Акрамя таго, законапраект патрабуе, каб у вышэйшых органах улады і органах мясцовага самакіравання арыгіналы дакументаў рыхтаваліся на дзяржаўнай мове.
Канцэпцыя ўмацавання міжэтнічных адносін, ухваленая Радай абароны, была распрацаваная на аснове некалькіх праектаў, прапанаваных дэпутатамі і Асамблеяй народа Кыргызстана. Асноўная мэта канцэпцыі — «забеспячэнне нацыянальнага адзінства праз паляпшэнне міжэтнічных адносін, захаванне культурнай спадчыны і этнічнай разнастайнасці».
Цяпер чытаюць
Галіна Дзербыш казала пракурору: «Як памру, буду да ўсіх вас ноччу прыходзіць». І жыццё ўжо дагнала яе суддзю і сведак. Гісторыя пенсіянеркі, якой далі 20 гадоў калоніі13
Каментары