25 сакавіка ў пары чакалася трэцяя гадавіна вяселля.
«12 сакавіка каля 3.00 беспрацоўны мясцовы жыхар, які знаходзіўся ў стане алкагольнага ап’янення, падчас сваркі на глебе непрыязных адносінаў нанёс не менш за дваццаць удараў нажом па розных частках цела, ад якіх пацярпелы на месцы памёр, пасля чаго падпаліў дом і збег». Сухая міліцэйская зводка. А за будзённасцю следчых — трагедыя маладой сям’і.
Загінулы — 26-гадовы жыхар Вілейкі Аляксандр. За некалькі дзён да трагедыі ён адвёз жонку з маленькім сынам у бальніцу. Калі яны вярнуліся, ні мужа, ні таты, ні дома — засталіся адны і без нічога.
«Я сябраваў з Сашам. Ягоная жонка Марына — моцны чалавек, не падае выгляду, як ёй цяжка, хаця мо душа і крычыць, — расказаў сябра сям’і Аляксей. — У тую ноч, а 5 раніцы, Саша павінен быў ехаць у Бараўляны забіраць Марыну з сынам — 2-гадоваму Андрэю зрабілі аперацыю. Сын і ў дзень пахавання ляжаў з тэмпературай у дзядулі з бабуляй — не ўзялі на развітанне з татам».
Аляксандра знайшлі мёртвым на падлозе выратавальнікі.Калі яны прыехалі па выкліку суседзяў, што пабачылі задымленасць, палова дома ўжо палала. З другой часткі з атручваннем дымам вынеслі пенсіянерку — жывую.
Палову дома яшчэ бацькі Алякандра купілі пад лецішча, хоць ён і знаходзіцца ў цэнтры Вілейкі. А калі ў Сашы і Марыны нарадзіўся сын, то маладыя пераехалі туды жыць. 25 сакавіка ў іх мусіла быць чарговая гадавіна вяселля — 3 гады.
«Людзей на пахаванні было шмат: не ўсе нават маглі падысці да труны — стаялі на ўваходзе на могілкі... Калі затрымалі падазраваных, яны ва ўсім прызналіся.Мэта нібыта была ясная — забіць, абрабаваць, спаліць. Ён забіваў, а яна падпальвала», — расказвае Аляксей. Ён пачуў такую версію ад міліцыянтаў. У Следчым камітэце ж пакуль скупа паведамляюць, што затрыманых двое — мужчына і жанчына. Але Вілейка — горад невялікі, і мясцовыя ведаюць, каго затрымалі. Павел і Наста — муж і жонка. Яму — 35, ёй — 24. Наркаманы.
Абмяркоўваюць і розныя версіі таго, што адбылося. Адна з іх — Саша напярэдадні прагаварыўся дзесьці, што мае грошы. «У яго былі вялікія грошы, але не на руках, а перадаў сябру. І ён не з тых, хто выхваляўся б гэтым. Ён машыны з-за мяжы ганяў. Можа нешта прадчуваў ці пасварыўся тады з кімсьці, што грошы — 17000 даляраў — дома не пакінуў. Ён атрымаў замову і мусіў праз некалькі дзён ехаць у Літву па аўто», — расказаў Аляксей.
Сябра сям’і не ўяўляе, чаму менавіта да Сашы прыйшла тая пара. Кажа, што не ведае нават агульных знаёмых паміж імі.«Ён жыў нядрэнна — свой дом, на «БМВ-7» ездзіў, сябры былі ўплывовыя... Не стаў бы і кантактаваць з наркаманамі».
Крымінальную справу завялі па факце забойства з асаблівай жорсткасцю. Калі дакажуць віну затрыманых, ім пагражае пакаранне ад васьмі гадоў турмы ажно да расстрэлу.
***
Падобны выпадак адбыўся 7 сакавіка ў Старадарожскім раёне. 62-гадовы пенсіянер выпіваў дома ў вёсцы Новы Рабак з 23-гадовым маладзёнам. Узкніла сварка, і хлопец забіў дзеда: кіем прабіў грудзіну і пашкодзіў лёгкія. А каб схаваць забойства, падпаліў дом. Падазраванага затрымалі.
Каментары