Кіраўнікі прадпрыемстваў мусілі забяспечыць не толькі набыццё білетаў, але і яўку.
Забяспечыць удзел і даць справаздачу ў аддзел культуры райвыканкама аб колькасці набытых квітках на канцэрт спявачкі Ганны Шаркуновай, які плануецца 13 чэрвеня ў Ганцавічах, абавязалі кіраўнікоў прадпрыемстваў, устаноў і арганізацый Ганцавіцкага раёна.
З просьбай аказаць садзейнічанне і пераканаць падначаленых выдаткавацца на канцэрт да кіраўнікоў звярнуўся намеснік старшыні Ганцавіцкага райвыканкама Сяргей Саракоў.Вось тэкст разасланай тэлефанаграмы: «13 чэрвеня 2013, а 18.00 у гарадскім Доме культуры адбудзецца канцэрт Ганны Шаркуновай (г. Мінск). Цана квітка 40 000 рублёў.
Прашу аказаць садзейнічанне і забяспечыць удзел у канцэрце дэлегацыі працоўнага калектыву ў колькасці, згодна з дадаткам. У тэрмін да 11 чэрвеня 2013 года прадаставіць у аддзел культуры райвыканкама (каб. 413) інфармацыю аб набытых квітках і пацвердзіць яўку дэлегацыі».
Такім правераным і надзейным спосабам у горадзе Ганцавічы далучаюць да культуры. А то ці мала, ганцаўцы возьмуць ды і не пойдуць на канцэрт сталічнай зоркі, і спяваць артыстцы прыйдзецца ў паўпустой зале… Як такое дапусціць? — іранізуюць аўтары выдання «Ганцавіцкі час».
Цікава, што прадусар Ганны Шаркуновай Уладзімір Кубышкін не так даўно ганарыўся незалежнасцю сваіх артыстаў.«Мы ніколі не былі пад „дахамі“ філармоній ці канцэртных залаў. Нам закручвалі гайкі, але цяпер ніводная сволач не зможа мяне папракнуць ні ў чым», — казаў ён. Відаць, знайшоўся дах вышэй за філарманічны.
Стала вядомая асоба рабочага «Беларуськалія», які загінуў пры абрушэнні горнай пароды1
Каментары