Беларус Леанід Кучук падпісаў трохгадовы кантракт з маскоўскім «Лакаматывам».
Ён змяніў знакамітага харвата Славена Біліча. У мінулым сезоне масквічы занялі ў чэмпіянаце Расіі дзявятае месца і не трапілі ў еўракубкі — гэта найгоршы вынік каманды ў яе суверэннай гісторыі.
Кучук зрабіў сабе імя ў Малдове. Пад яго кіраўніцтвам «Шэрыф» з Ціраспаля стаў флагманам малдаўскага футбола.
Затым Кучук прыняў новы выклік — разам з памочнікам яшчэ адным беларусам Андрэем Сасніцкім перайшоў у кіеўскі «Арсенал». У мінулым сезоне пад яго кіраўніцтвам толькі «Арсенал» здолеў перайграць чэмпіёнскі «Шахцёр». Але зімой 2013 года кіеўскі клуб страціў асноўных спонсараў, і Кучук палічыў, што ў такой сітуацыі «Арсенал» не зможа вырашаць сур`ёзныя задачы.
У выніку беларускі спецыяліст узначаліў краснадарскую «Кубань». У вясновай частцы чэмпіянату Расіі краснадарскі клуб адзіны, хто не прайграў ніводнага матча, і, заняўшы пятае месца, упершыню ў сваёй гісторыі прабіўся ў еўракубкі.
Кіраўніцтва «Кубані» прапанавала Кучуку новы кантракт, але беларускі спецыяліст адгукнуўся на выклік «Лакаматыва». Адзначым, што ў складзе чыгуначнікаў выступае беларускі апорны паўабаронца Ян Цігараў.
Каментары