Старшыня Еўрапарламента Раберта Метсола напярэдадні пасяджэння 25 сакавіка выступіла з заявай у падтрымку беларусаў. Таксама сумесную заяву з гэтай нагоды выдала група дэпутатаў.
Раберта Метсола ў сваёй заяве адзначыла, што гэтая дата мае асаблівае значэнне для Беларусі як сімвал барацьбы за свабоду і дэмакратыю.
«Сёння мы адзначаем Міжнародны дзень салідарнасці з Беларуссю, вядомы як Дзень Волі. У гэты дзень у 1918 годзе Беларусь абвясціла незалежнасць. Для мільёнаў беларусаў гэтая гадавіна стала магутным сімвалам пратэсту супраць прыгнятальнай дыктатуры. І мы карыстаемся гэтай магчымасцю, каб зноў пацвердзіць нашу падтрымку ўсім беларусам, якія змагаюцца за свабодную і дэмакратычную краіну».
Аўтары заявы ад дэпутатаў падкрэслілі, што Дзень Волі — гэта не толькі гістарычная дата, але і сімвал імкнення беларусаў да свабоды, годнасці і самавызначэння. Сёння ён набывае асаблівае значэнне як знак супраціву ва ўмовах працяглых рэпрэсій пасля фальсіфікаваных выбараў 2020 года.
У заяве адзначаецца, што, нягледзячы на вызваленне некаторых палітвязняў, каля 900 чалавек па-ранейшаму застаюцца за кратамі, а рэпрэсіі працягваюцца. Асаблівую занепакоенасць выклікае ціск на грамадзянскую супольнасць і беларускую культуру.
Еўрадэпутаты падкрэсліваюць, што суверэнітэт Беларусі знаходзіцца пад пагрозай на фоне ўзрастаючай залежнасці ад Расіі, і заклікаюць да яго абароны. Яны пацвярджаюць падтрымку дэмакратычным сілам Беларусі і права беларусаў самастойна вызначаць сваю будучыню.
Аўтары заявы выказалі салідарнасць з беларусамі па ўсім свеце і падкрэслілі, што Еўропа працягне падтрымліваць шлях Беларусі да свабоды, дэмакратыі і вяртання ў еўрапейскую сям’ю.
Заяву падпісалі: старшыня Камітэта па замежных справах (AFET) Дэвід Макалістэр, старшыня Падкамітэта па правах чалавека Мунір Сатуры, старшыня Дэлегацыі па сувязях з Беларуссю Малгажата Гасеўская, а таксама ад імя Бюро дэлегацыі — першы віцэ-старшыня Томаш Тобэ і другі віцэ-старшыня Міхал Кабоска, а таксама пастаянны дакладчык AFET па Беларусі Хельмут Брандштэтэр.
Цяпер чытаюць
У 2020 годзе ябацька Аміна «актыўна галасавала» за Лукашэнку. А цяпер не разумее, чаму родная маці на яе данесла, а міліцыя затрымала24
Каментары