Уладзімір Праснякоў выканаў па-беларуску песню на словы Янкі Лучыны
У расійскай зоркі Уладзіміра Праснякова ў рэпертуары раней з'явілася песня на беларускай мове.
Песню «Спі, малы сакол» напісаў кампазітар Раман Козыраў на словы класіка Янкі Лучыны для юнага беларускага выканаўцы Ромы Валазнёва. Валазнёў планаваў удзел у песенным конкурсе на «Славянскім базары», але не змог прыняць у ім удзел, бо яму яшчэ не споўнілася 18 гадоў.
«Аднак песня мне і бацькам вельмі спадабалася: мы вырашылі забраць яе на будучыню, — распавёў Раман Валазнёў. — Свае новыя кампазіцыі я адпраўляю Уладзіміру Праснякову з просьбай ацаніць; для гэтай песні я зрабіў аранжыроўку і таксама яму паслаў. Валодзя адказаў, што песня вельмі прыгожая, і прапанаваў праспяваць яе ўдвух.
Я здзівіўся, маўляў, яна ж на беларускай мове, ды і аранжыроўка мая наўрад ці падыдзе. На што Праснякоў сказаў:
«У мяне жонка хіба не беларуска? А аранжыроўку мы зробім!»Так песня набыла новае жыццё ў аранжыроўцы Уладзіміра Праснякова, якую ён мне падарыў, — гэта царскі падарунак! І яшчэ Валодзя папрасіў у мяне дазволу выканаць гэтую песню ў дуэце з [яго жонкай] Наталляй Падольскай: мне нават было няёмка... Вядома, я цешуся, што яны спяваюць маю песню».
Пазнаёміліся Раман і Уладзімір Праснякоў ў 2009 годзе:беларус быў удзельнікам конкурсу «Дзіцячая «Новая хваля», дзе заняў 2-е месца. У анкеце было пытанне: «З кім з зорак вы марылі б праспяваць дуэтам?» Рома напісаў, што з Уладзімірам Прасняковым.
«Аказваецца, мары спраўджваюцца, — кажа юны артыст. — Мы дуэтам выканалі ўжо нямала песень, і спадзяюся, што наша супрацоўніцтва будзе працягвацца».
Каментары