У чацвёртым квартале гэтага года Расія паставіць у Беларусь 3,1 млн. тон нафты.
Такі аб’ём прадугледжаны зацверджаным графікам транспарціроўкі нафты па сістэме магістральных нафтаправодаў за межы Расійскай Федэрацыі, паведамляе РІА Новости са спасылкай на прадстаўніка прэс-службы Міністэрства энергетыкі РФ.
Нагадаем, напярэдадні 2013 года Расія адмовілася падпісваць з Беларуссю гадавы баланс паставак, апасаючыся аднаўлення беларускім бокам «шэрага» экспарту растваральнікаў і разбавіцеляў.
Сёлета пастаўкі нафты адбываюцца ў рамках графікаў, якія зацвярджаюцца штоквартальна. Кожны квартал на беларускія НПЗ паступала 5,75 млн. тон расійскай нафты.
Пастаўкі нафты ў чацвёртым квартале гэтага года і на 2014 год Беларусь мела намер абмеркаваць з Расіяй на найбліжэйшым пасяджэнні Саюзнага ўрада.
Яго планавалася правесці ў Маскве 17 верасня, аднак затым сустрэча была перанесеная.
Як паведаміла БелаПАН інфармаваная крыніца — «па тэхнічных прычынах». Пасяджэнне саюзнага ўрада, паводле яе слоў, можа адбыцца ў кастрычніку.
У канцы жніўня кампанія «Транснефць» паведаміла пра намер скараціць з верасня пастаўкі нафты ў Беларусь на 400 тыс. тон у сувязі з рамонтнымі работамі на нафтаправодзе «Дружба».
Гэта адбылося неўзабаве пасля затрымання ў Мінску гендырэктара Уралкалія Уладзіслава Баўмгертнера.
Іншая расійская кампанія — «Раснефць», якая валодае Мазырскім НПЗ праз «Слаўнафту» (сумесны актыў з «Газпром нафтай») — папрасіла «Транснефць» не зніжаць пастаўкі на завод у сувязі з неабходнасцю выканання кантрактных абавязацельстваў.
Кіраўнік «Раснефці» Ігар Сечын заявіў, што ўрон кампаніі ад зніжэння паставак нафты ў Беларусь у чацвёртым квартале можа скласці 3 млн. долараў за месяц.
Падчас візіту Сечына ў Мінск 11 верасня Аляксандр Лукашэнка падзякаваў яму «за прынцыповасць», якую кіраўніцтва «Раснефці» праяўляе ў пытаннях абавязацельстваў па пастаўках нафты ў Беларусь.
Паводле слоў Лукашэнкі, пасля заявы «Транснефці» аб намеры паменшыць пастаўкі нафты на беларускія НПЗ ён даручыў першаму віцэ-прэм’еру Уладзіміру Сямашку «заключыць дагаворы па пастаўках нафты з сусветнага рынку па сусветных цэнах».
«Дзявацца было няма куды, паколькі завод жа не спыніш — гэта велізарны ўрон. Таму ваша заява была дарэчы», — сказаў кіраўнік дзяржавы.
Раней расійскі бок увязваў падпісанне паліўна-энергетычнага балансу з ходам рэалізацыі беларуска-расійскіх праектаў у прамысловай сферы. Да гэтага часу вызначаныя пяць такіх праектаў.
Цяпер чытаюць
Стала вядомая асоба рабочага «Беларуськалія», які загінуў пры абрушэнні горнай пароды1
Каментары