21.11.2013. Твор аднаго Сабакі, змешчаны ў фэйсбуку, перадрукаваў сайт «Нашай Нівы». Граждан тут жа напісаў каментар: «Гэта не верш, а нейкая херня сабачая!» — і падпісаўся «Ваўкалака». Праз паўгадзіны Граждан зрабіў яшчэ адзін каментар: «Вельмі-вельмі слаба і бездапаможна!» — і падпісаўся «Лявон». Пачакаўшы яшчэ хвілін пяць, Граждан пад псеўданімам «Чытач» напісаў: «Поўная графаманія!» Прайшло яшчэ хвіліны тры, і Граждан, пакінуўшы новы запіс: «Гэтая «Наша Ніва» не разбіраецца ў паэзіі! Перастаньце друкаваць абы-што, а то я перастану вас чытаць!» — пад подпісам «Літаратуразнавец з паўвекавым стажам», задаволена абцёр аб азадак рукі і сеў вячэраць…
22.11.2013. Адзін Сабака размясціў на сайце «Нашай Нівы» верш Граждана. Тут жа Граждан напісаў каментар пад сваім тварэннем: «Класіка! Эўрапейскі ўзровень!» і падпісаўся «Паэт». Праз паўгадзіны Граждан зрабіў яшчэ адзін каментар: «Вельмі-вельмі моцна! Шэдэўральна! Хрэстэматыйна!» і падпісаўся «Філолаг». Пачакаўшы яшчэ хвілін пяць, Граждан пад сваім творам напісаў: «Я ў захапленні! Гэта новае слова ў літаратуры!» і падпісаўся «Дацэнт». Прайшло яшчэ хвіліны тры, і Граждан, пакінуўшы новы запіс «Твор варты Нобелеўскай прэміі! Друкуйце часцей нашага знакамітага Граждана і вы будзеце самай чытанай газетай у свеце!» пад подпісам «Доктар навук з залатым дыпломам», задаволена абцёр аб азадак рукі і сеў вячэраць…
