Аляксандр Лукашэнка дагэтуль не павіншаваў мітр. Паўла з прызначэннем
З гледзішча беларускіх законаў, легітымным кіраўніком БПЦ мітрапаліт Павел можа стаць толькі пасля таго, як атрымае беларускае грамадзянства.
25 снежня Святы Сінод Рускай праваслаўнай царквы нечакана прызначыў кіраўніком БПЦ мітрапаліта Разанскага Паўла — не беларуса і які ніколі не жыў у Беларусі.
З гледзішча беларускіх законаў, легітымным кіраўніком БПЦ мітрапаліт Павел можа стаць толькі пасля таго, як атрымае беларускае грамадзянства. Такое палажэнне прадугледжана Законам «Аб свабодзе сумлення і рэлігійных арганізацыях», артыкул 13: «Кіраўніком рэлігійнай арганізацыі можа быць толькі грамадзянін Рэспублікі Беларусь».
Магчыма, Аляксандр Лукашэнка чакае з віншаваннем да выканання гэтай фармальнасці. Каб падкрэсліць новаму прадстаяцелю, хто ў хаце гаспадар.
Патрыярх Кірыл сваім рашэннем паставіў у Мінск чужога чалавека. Гэтым ён падкрэсліў залежны статус Беларускай праваслаўнай царквы.
Гэта таксама выяўляе недавер Масквы да беларусаў, якія, баяцца ў РПЦ, хочуць зрабіць Беларускую праваслаўную царкву самакіраванай і больш беларускай, якой стала ўжо Украінская.
Гэта таксама выклік Аляксандру Лукашэнку, які сцвярджае, што ў саюзе з Расіяй Беларусь мае незалежнасць.
Прызначэнне Паўла выклікала пратэст і расчараванне ва ўлонні беларускага праваслаўя, анітрохі не менш старажытнага, чым маскоўскае.
Святы Сінод пастанавіў задаволіць прашэнне, пададзенае мітрапалітам Мінскім і Слуцкім Філарэтам, Патрыяршым Экзархам усяе Беларусі, аб адстаўцы ў сувязі з дасягненнем 75- гадовага ўзросту. Мітрапаліт Філарэт, як вядома, цяжка хварэў на дыябет. Прашэнне ён падаў яшчэ тры гады таму, і вось толькі цяпер патрыярх Кірыл прыняў рашэнне.
Мітрапаліт Філарэт (Вахрамееў) таксама не быў беларусам і таксама да прызначэння ніколі не працаваў у Беларусі.
Многія япіскапы і святары праваслаўнай царквы спадзяваліся, што новым кіраўніком царквы стане гэтым разам беларус. Называліся імёны архіепіскапа Віцебскага, епіскапа Навагрудскага або, прынамсі, архіерэяў-беларусаў, што служаць у Расіі.
І Украінскай, і Польскай, і іншымі праваслаўнымі цэрквамі кіруюць мясцовыя людзі.
Мітрапаліт Павел выступаў з заявамі імперска-нацыяналістычнага толку. У прыватнасці, ён заявіў, што Расія можа шантажаваць свет ядзернай і бактрыялагічнай зброяй і здольная «адкрыць чарнобыльскі кранік», каб пакараць сваіх праціўнікаў.
У адзін дзень з абвяшчэннем аб прызначэнні мітр. Паўла стала вядома пра выдзяленне Беларусі расійскага крэдыту на 2 мільярды даляраў без асаблівых умоваў.
Каментары