Прэзідыум Вярхоўнага суда Расіі знізіў экс-кіраўніку «МЕНАТЕП» Платону Лебедзеву пакаранне да ўжо адбытага і пастанавіў вызваліць яго. Пра гэта ў чацвер, 23 студзеня, паведамляе «Інтэрфакс».
Прэзідыум суда таксама адмовіўся адпраўляць на перагляд прысуды па справах Міхаіла Хадаркоўскага і Платона Лебедзева. Паводле прысуду, Лебедзеў павінен быў выйсці на волю 2 мая 2014 года.
20 снежня экс-старшыня «ЮКАСа» Міхаіл Хадаркоўскі быў вызвалены з калоніі ў Карэліі і пакінуў Расію пасля падпісання прэзідэнтам Уладзімірам Пуціным указа аб памілаванні.
Хадаркоўскі знаходзіўся пад вартай з кастрычніка 2003 года. Ён абвінавачваўся ў крадзяжах і нявыплаце падаткаў. Разам з экс-кіраўніком «ЮКАСа» перад судом паўстаў яго бізнэс-партнёр Платон Лебедзеў. Яны былі прызнаныя вінаватымі ў шэрагу эканамічных злачынстваў і атрымалі па 8 гадоў турмы.
У канцы 2006 года супраць Хадаркоўскага і Лебедзева завялі яшчэ адну справу — аб крадзяжы нафты. Яны атрымалі па 14 гадоў калоніі, пазней тэрмін зняволення быў нязначна зніжаны.
Цяпер чытаюць
Памятаеце былога памежніка, які стаў дальнабойшчыкам і ў Германіі прызнаваўся ў любові да Лукашэнкі? З ім бяда11
Каментары