Больш за трыццаць кліпаў за два дні ў адным месцы.
У першы дзень «Кліп‑марафону» будуць дэманстравацца як новыя, так і рарытэтныя відэа. На другі дзень адбудзецца непасрэдна конкурсная частка. Лепшыя кліпы будуць абраныя шляхам глядацкага галасаваньня. А пераможцы атрымаюць памятныя статуэткі і дыплёмы.
Гледачы таксама не застануцца без падарунка — па выніках конкурсу будуць выдадзеныя DVD зь лепшымі кліпамі.
Заяўлена, што ў «Кліп‑марафоне» возьмуць удзел вядомыя беларускія гурты: «N.R.M.», «Крамбамбуля», «Стары Ольса», «Zet», «Нейро Дюбель», «Крок», «:B:N:», «PLAN», «IQ48», «Палац», «Зьніч», «Бонда» і іншыя.
Усяго будзе прадэманстравана болей 30 музычных відэа 1991‑2007 гадоў. Фэстываль ладзіцца незарэгістраванай «Моладзьдзю БНФ» у межах кампаніі ў абарону беларускіх музыкаў. Плянуецца праводзіць такое мерапрыемства штогод.
І хаця пэўная частка новых, зьнятых сёлета кліпаў на фэсьце прадстаўлена ня будзе, само мерапрыемства можа стаць цудоўнай нагодай яшчэ раз узгадаць старыя‑добрыя відэа любімых музыкаў, якія, на жаль, не пабачыш на музычных каналах.
Так, вакаліст «IQ48» Саша Ракавец нічога ня чуў пра правядзеньне марафону, таму гледачы, верагодна, убачаць толькі адзін кліп гурту на песьню «Таполі». Хаця «здаровыя лосі» ўжо пасьпелі зьняць яшчэ два відэа і больш таго, атрымаць на іх правы. А гэта значыць, што пасьля афіцыйнага запуску канала БелСат, новыя кліпы «IQ48» можна будзе ўбачыць і на іншых каналах.
Цяпер чытаюць
«Калі шандарахне па цягніку, хто будзе лідарам дэмсіл?» Два дні з дэлегацыяй Ціханоўскай у Кіеве — што засталося за кадрам30
Каментары