У Страсбуры на пачатку сёньняшняга пленарнага паседжаньня Эўрапарлямэнту яго прэзыдэнт Хасэп Барэл прывітаў лідэра аб’яднанай беларускай апазыцыі Аляксандра Мілінкевіча, які прыехаў, каб назіраць за сёньняшнімі дэбатамі аб рэзалюцыі што да сытуацыі ў Беларусі – гэтую рэзалюцыю мяркуецца ўхваліць у чацьвер.
Чакаецца, што ў гэтым дакумэнце будуць палажэньні – аб забароне на ўезд беларускіх чыноўнікаў у краіны Эўразьвязу, аб актывах і грашох Аляксандра Лукашэнкі, аб прэзыдэнцкіх выбарах і будучай палітыцы Эўразьвязу дачынна Беларусі.
Некаторыя эўрадэпутаты на знак салідарнасьці зь Беларусьсю маюць бел-чырвона-белыя шалікі або іншую атрыбутыку нацыянальных беларускіх колераў.
Аляксандар Мілінкевіч падчас свайго візыту ў Страсбур даў інтэрвію тэлеканалу «Эўраньюз», у якім сказаў, што дэманстрацыі, праведзеныя пасьля прэзыдэнцкіх выбараў, далі людзям надзею.
«Я веру, што пасьля галасаваньня вельмі шмат людзей у Беларусі, шмат нашых грамадзянаў пераадолелі страх, што існуе ў нашай краіне. Сёньня яны могуць змагацца за свой гонар і за сваю будучыню, гэта ёсьць вялікім вынікам і дасягненьнем для нас, – сказаў Аляксандр Мілінкевіч. – Цяпер апазыцыя прадбачыць масавы пратэст, які можа адбыцца ў той час, калі Аляксандар Лукашэнка будзе трэці раз даваць прысягу ў гэтыя выходныя».
У Познані гінеколаг выдаліў 24‑гадовай беларусцы матку і яечнікі без яе згоды. Яму пагражае да 20 гадоў турмы12
Каментары