Лідар «Правага сектара», кандыдат у прэзідэнты Украіны Дзмітрый Яраш не выключае аб'яднання з партыяй «Свабода» і ўваходжання ў сілавыя структуры пасля выбараў.
Пра гэта ён заявіў у эфіры праграмы «Шустэр Live» у сераду ўвечары.
«Не выключана, што «Правы сектар» пойдзе ў структуры ўлады ў той час, калі ёсць агрэсія Расеі, нас бы цікавіў сілавы блок, не абавязкова мне займаць нейкую пасаду, мы можам рэкамендаваць нейкіх людзей ва ўладу — менавіта для таго, каб правесці радыкальную рэформу Міністэрства ўнутраных спраў, каб павысіць абаронную моц Узброеных сіл Украіны», — паведамляе Інтэрфакс-Украіна.
Ён дадаў, што ўсё будзе залежаць ад таго, якая каманда будзе выводзіць Украіну з крызісу пасля выбараў прэзідэнта Украіны.
«На гэтым этапе гэта магчымы варыянт, але трэба глядзець, які будзе прэм'ер-міністр, якая будзе каманда, якая будзе праграма дзеянняў, і наколькі нашы праграмныя прынцыпы будуць адпавядаць прынцыпам новага ўрада, які будзе выводзіць Украіну з таго стану, у якім яна ёсць цяпер», — растлумачыў Яраш.
Ён таксама дапусціў магчымасць зліцця з партыяй «Свабода», паведамляюць Украінскія навіны.
«Я не выключаю, што і «Свабода», і «Правы сектар» могуць у будучыні стаць адной палітычнай сілай. Прынамсі, у нас няма нейкіх варожых адносін, і мы можам у перспектыве разглядаць любыя канструкцыі палітычныя і партыйныя», — сказаў ён.
Яраш адзначыў, што ў «Правага сектара» няма асаблівых разыходжанняў са «Свабодай», акрамя пытання ўдзелу Украіны ў эканамічных саюзах з замежнымі дзяржавамі і арганізацыямі і пытанне «гвалтоўнай украінізацыі».
Пры гэтым ён адзначыў, што «Правы сектар» не ўспрымае пэўныя заявы (дэпутата Вярхоўнай Рады ад фракцыі «Свабода») Ірыны Фарыон, таму што ў шэрагах «Правага сектара» ёсць вельмі шмат рускамоўных грамадзян, якія прызнаюць украінскую адзінай дзяржаўнай мовай.
Разам з тым ён паведаміў, што лічыць неабходнай працу ў тым кірунку, каб нацыяналістычны рух быў цалкам адзіным.
Каментары