В.а. намесніка кіраўніка адміністрацыі прэзідэнта Украіны Андрэй Сенчанка паведаміў, што па стане на 2 чэрвеня з Крыма на мацерыковую частку Украіны выехалі 9500 жыхароў Крыма, з Данецкай вобласці ў іншыя рэгіёны Украіны выехала да 550 чалавек, з Луганскай — 150.
Пра гэта ён сказаў у эфіры тэлеканала «Першы Нацыянальны».
«У нас на сённяшні дзень такіх вымушаных перасяленцаў з Крыма амаль 9500 чалавек, з Данецкай вобласці, па маіх дадзеных, на сёння дзесьці 530—550, з Луганскай вобласці менш, каля 150 чалавек выехалі», — сказаў в.а. намесніка кіраўніка адміністрацыі.
Гэта толькі афіцыйна зарэгістраваныя бежанцы. Шмат хто проста пераехаў да сваякоў і не рэгістраваўся.
Сенчанка прызнаў, што плынь вымушаных перасяленцаў павялічваецца.
Ён паведаміў, што ўлады падрыхтавалі 42 тыс. месцаў для часовага размяшчэння перасяленцаў.
«39 [тысяч] з іх яшчэ вольныя. Іншая справа, што не ўсіх гатовы прыняць Кіеў. 22 тыс. месцаў знаходзяцца ў Чаркаскай вобласці», — паведаміў Сенчанка.
Крымскія татары пераважна застаюцца на сваёй гістарычнай радзіме. Уцякаюць ад рэпрэсій украінскамоўныя ўкраінцы, вернікі Украінскай праваслаўнай царквы Кіеўскага патрыярхата, сябры ўкраінскіх партый. Вялікая частка ўцекачоў з Крыма — гэта сем'і ўкраінскіх вайскоўцаў.
Каментары