У сталічнай галерэі «Ў» 30 жніўня праходзіць III Агракультурны фестываль, на якім беларускія фермеры прадстаўляюць свае экалагічныя гаспадаркі, вырабляемую імі арганічную прадукцыю, а спецыялісты праводзяць майстар-класы па якасці вады і арганізацыі чыстай дзейнасці на зямельных участках.
Арганізатарамі мерапрыемства выступілі галерэя сучаснага мастацтва «Ў», грамадскае аб'яднанне «Экадом» і экалагічная ўстанова «Агра-Эка-Культура». Фестываль арганізаваны пры садзейнічанні Цэнтра экалагічных рашэнняў і «Зялёнай сеткі».
Паволе слоў арганізатараў, агракультурны фестываль за апошнія гады стаў сапраўдным святам арганічнага ўраджаю для тых, хто зацікаўлены ў якасці спажываемай прадукцыі. Сёлета праграма фестывалю надзвычай разнастайная — гэта знаёмства з беларускімі фермерамі і прэзентацыі іх экалагічных гаспадарак, дэгустацыя іх арганічнай прадукцыі, майстар-класы па вядзенні чыстай гаспадаркі, дыскусіі, выстава і канцэрт гурту Port Mone.
Як паведаміла прадстаўнік «Экадома» Ірына Сухій на прэс-канферэнцыі перад адкрыццём фестывалю, апошнім часам адзначаецца павышаная цікавасць да арганічнага земляробства.
«Калі мы пачыналі, мы звяталіся з першым лістом у Мінсельгасхарч з пытаннем, ці зацікаўлена дзяржава ў арганічнай сельскай гаспадарцы, чым мы можам дапамагчы, — сказала яна. — Мы атрымалі адказ, што дзяржава ў гэтым не зацікаўлена, гэта не прыярытэт для Беларусі. Праз некаторы час сітуацыя змянілася. Нядаўна была прынята і зацверджана Саўмінам праграма па развіцці арганічнай сельскай гаспадаркі. Рыхтуецца адпаведнае заканадаўства».
Прадстаўнік экалагічнай установы «Агра-Эка-Культура», кандыдат сельскагаспадарчых навук Лана Семенас расказала аб важнасці арганічнай сельскай гаспадаркі. Спецыяліст адзначыла, што арганічнае земляробства шмат у чым адрозніваецца ад таго, якое сёння паўсюдна практыкуецца ў Беларусі, тым, што «яно імкнецца працаваць у гармоніі з прыродай», каб «атрымліваць чыстую прдукцыю». Такая прадукцыя «не ўтрымлівае пестыцыдаў, іншых шкодных рэчываў», гэта «больш смачныя і карысныя для здароўя прадукты». У той жа час арганічная сельская гаспадарка, паводле яе слоў, важная не толькі для чалавека, але і для прыроды, якая не пакутуе ад выкарыстання хімікатаў.
«Мы бачым, што з кожным годам цікавасць да арганічнай сельскай гаспадаркі толькі расце», — падкрэсліла Семенас.
Цяпер чытаюць
Пратасевіч зноў жэніцца — цяпер з таролагам Настассяй, якая працавала ў элітным медцэнтры «Мерсі»37
Каментары