Гэта здарыцца ўпершыню за час расійскай агрэсіі ў Крыме і Данбасе.
На перамовах, якія прайшлі ў Ньюпарце (Уэльс) на палях саміту НАТА, была дасягнутая дамоўленасць аб пастаўках у Украіну высокадакладнай зброі. Пра гэта паведаміў прэзідэнт Пятро Парашэнка на супольнай прэс-канферэнцыі з Генсакам альянса Андэрсам Фог Расмусэнам.
«Дасягнута дамоўленасць на двухбаковым узроўні (з краінамі-ўдзельніцамі НАТА) адносна вайскова-тэхнічнага супрацоўніцтва, у тым ліку аб пастаўках нелетальнага і летальнага ўзбраення, уключаючы высокадакладную зброю», — заявіў кіраўнік Украіны.
Парашэнка асобна падкрэсліў, што гэтая дамоўленасць дасягнутая не з альянсам у цэлым, а з канкрэтнымі краінамі-ўдзельніцамі альянса.
Між тым, НАТА не мае пярэчанняў у дачыненні да такіх паставак і нават заахвочвае іх. «У рэзалюцыі камісіі Украіна-НАТА будуць словы аб заахвочванні ваенна-тэхнічнага супрацоўніцтва», - адзначыў прэзідэнт.
Пятро Парашэнка не ўдакладніў, з якімі менавіта краінамі ён дамовіўся аб ваеннай дапамозе. Вядома, што ў чацвер ён праводзіў сустрэчы з лідэрамі ЗША, Германіі, Францыі, Італіі, Вялікабрытаніі і Канады.
Каментары